Read Свето Писмо: Стандардна Библија 2006 (со девтероканонски книги) Повторени закони 11 Bible Online

Повторени закони 11 - Свето Писмо: Стандардна Библија 2006 (со девтероканонски книги) bible

Повторени закони 11

¹И така, сакај Го Господа, твојот Бог, и внимавај — она што го заповедал да го пазиш, — и наредбите Негови, и законите Негови, и заповедите Негови во сите денови.

²Па потчинете се сега, — бидејќи јас не зборувам со синовите ваши, кои не ги знаат и не ги виделе казните од Господ, вашиот Бог, — Неговото величие — Неговата незапирлива сила;

³чудата Негови и делата Негови, што ги направи среде Египет со фараонот, царот египетски, и со целата негова земја,

⁴и она што го направи Тој со египетската војска, со коњите и колите, што ги потопи Тој во водите на Црвеното Море, кога тие ве гонеа, — и Господ ги уништи засекогаш, —

⁵и што направи Тој за вас во пустината, додека не дојдовте на ова место,

⁶и што направи Тој со Датан и Авирон, синовите на Елијав, син Рувимов, кога земјата ја отвори устата и пред целиот Израел ги голтна нив и домовите нивни, и куќите нивни и целиот имот што го имаа;

⁷зашто вашите очи ги видоа сите тие големи дела на Господ, што Тој ги направи.

⁸И така, пазете ги сите заповеди, кои ви ги кажувам денес, за да бидете храбри, па да отидете и да ја наследите земјата, сите кои преминувате, за да ја освоите;

⁹и да живеете долго време во онаа земја, за која Господ им се заколна на предците ваши дека ќе им ја даде ним, и на поколенијата нивни, земјата, во која тече мед и млеко.

¹⁰Зашто земјата, во која одиш да ја освоиш, не е како египетската земја, од која излеговте, каде што ти, откако ќе го посееше семето свое, ја напојуваше со нозете свои, како зеленчукова градина.

¹¹Земјата, пак, во која одите за да ја освоите е земја со планини и долини, и се напојува со вода од небескиот дожд,

¹²земја, за која Господ, твојот Бог, се грижи: очите на Господ, твојот Бог, непрестајно се врз неа, од почетокот па сѐ до крајот на годината.

¹³Ако ги слушате заповедите што ви ги кажувам денес, ако Го сакаш Господа, твојот Бог, и Му служиш од сето срце твое и од сета душа твоја,

¹⁴Тој ќе ѝ даде на земјата твоја дожд навреме, ран и доцен, и ти ќе го собереш житото свое, виното свое и маслото свое;

¹⁵и ќе му даде трева на полето твое за твојот добиток и ти ќе јадеш и ќе бидеш сит.

¹⁶Но пазете, да не се соблазни срцето ваше, па да пристапите и да им служите на други богови и да им се поклонувате;

¹⁷зашто тогаш ќе се разгори гневот на Господ против вас, и Тој ќе го затвори небото и нема да има дожд, и земјата нема да го даде својот плод; и вие брзо ќе исчезнете од добрата земја, која Господ ви ја дава.

¹⁸И така, ставете ги овие мои зборови во срцето свое и во душата своја, врзете ги на раката своја како знак, и нека бидат тие врзулка меѓу очите ваши;

¹⁹учете ги синовите свои на нив, кажувајте им за нив, кога седиш дома и кога си на пат, кога си легнуваш и кога стануваш;

²⁰и напишете ги врз гредите од вратите на куќите ваши и на вашите градски порти,

²¹за да бидат вашите денови и деновите на вашите деца во онаа земја, за која Господ се заколна дека ќе им ја даде на предците ваши, толку колку што небото ќе биде над земјата.

²²Зашто, ако ги пазите сите тие заповеди, што ви ги кажувам и ги исполнувате, ако Го сакате Господа, вашиот Бог, ако одите по сите Негови патишта и се приврзете кон Него,

²³тогаш Господ ќе ги изгони сите тие народи од пред вас, и вие ќе владеете со народи, што се поголеми и посилни од вас;

²⁴секое место, на кое ќе стапи ногата ваша, ќе биде ваше: вашите предели ќе бидат од пустината и Ливан, и од реката Еуфрат, дури до морето, кое е на запад.

²⁵Никој нема да ви се противстави вам: Господ, вашиот Бог, ќе испрати страв и трепет пред вас врз секоја земја, на која ќе стапнете, како што ви говореше Тој.

²⁶Ете, јас ви давам денес благослов и проклетство;

²⁷благослов — ако ги послушате заповедите на Господ, вашиот Бог, што ви ги кажувам денес,

²⁸а проклетство — ако не ги послушате заповедите на Господ, вашиот Бог, и се отстраните од патот, што ви го посочувам денес, и тргнете по други богови, што не ги знаете.

²⁹Кога ќе те воведе Господ, твојот Бог, во онаа земја во која одиш за да ја освоиш, тогаш искажи благослов од планината Гаризим, а проклетство од планината Евал.

³⁰Тие се од онаа страна на Јордан, по патот кон зајдисонце, во земјата на Хананците, кои живеат во рамнината, спроти Гилгал, близу до дабјакот Море.

³¹Зашто вие го поминувате Јордан, за да отидете да ја освоите земјата, која ви ја дава Господ, вашиот Бог; освојте ја и населете се во неа.

³²И така, настојувајте да ги пазите сите наредби и закони, што ви ги предавам денес.