Read Свето Писмо: Стандардна Библија 2006 (со девтероканонски книги) Повторени закони 18 Bible Online

Повторени закони 18 - Свето Писмо: Стандардна Библија 2006 (со девтероканонски книги) bible

Повторени закони 18

¹Да нема дел и наследство во Израел за свештениците левити, во целото племе Левиево; тие треба да се хранат од жртвите за Господ, и од делот Негов,

²за нив нема да има дел меѓу браќата негови: Самиот Господ е негов дел, како што му рече Тој.

³Еве, што треба да биде определено за свештениците од народот, од оние, што принесуваат жртва вол или овца или коза; на свештеникот треба да му се дава плешката, вилиците и утробата;

⁴давај му исто така и првина од пченицата твоја, од виното твое и од маслото твое, и првината од стригот на овците твои,

⁵бидејќи Господ, твојот Бог, него го избра од сите твои племиња да стои и да служи во името Господово, тој и синовите негови во сите денови.

⁶И ако левит некој дојде од некој од твоите градови, низ целата земја на Израел, каде што живеел тој, и по желба на душата своја дојде на местото, што ќе го одбере Господ,

⁷и почне да служи во името на Господ, својот Бог, како и сите негови браќа левити, кои стојат таму пред Господ,

⁸како храна нека добие еднаков дел, освен добиеното од продажбата на татковиот имот.

⁹Кога ќе влезеш во земјата, која Господ, твојот Бог, ти ја дава, да не свикнеш да правиш гнасотии, какви што вршеле тие народи;

¹⁰да не се најде меѓу вас човек кој го тера синот свој или ќерката своја да помине преку оган, заради очистување, или да претскажува, да гата, или, пак, маѓесник,

¹¹бајач, или што повикува духови, ниту, пак, волшебник, ни таков што разговара со мртви;

¹²зашто, секој, кој го прави тоа, е гнасен пред Господ, и токму поради тие гнасотии Господ, твојот Бог, ги изгонува од пред тебе.

¹³Биди непорочен пред Господ, твојот Бог;

¹⁴зашто тие народи, што ти ги прогонуваш, ги слушаат гатачите и претскажувачите, а тоа Господ, твојот Бог, на тебе ти го забранил.

¹⁵Господ, твојот Бог, ќе ти дигне пророк од браќата твои, како мене, — Него слушајте Го, —

¹⁶бидејќи ти Го молеше Господа, твојот Бог, кај Хорив во денот на собранието, велејќи: „Да не го чујам во иднина гласот на Господ, нашиот Бог, и да не го видам повеќе тој голем оган, за да не умрам.“

¹⁷И ми рече Господ: „Добро е тоа, што го кажале;

¹⁸Јас ќе им издигнам пророк од браќата нивни, каков што си ти, ќе ги ставам зборовите Мои во устата Негова и Тој ќе им каже сѐ, што Јас ќе му заповедам;

¹⁹а кој не ќе ги послуша зборовите што ќе ги говори оној Пророк од Мое име, Јас ќе му се одмаздам.

²⁰Кој, пак, пророк ќе се осмели да зборува од Мое име, она што не сум му заповедал да говори и оној што ќе зборува од името на други богови, таквиот пророк да биде погубен.“

²¹Но ќе си речеш во срцето свое: „Како ќе разбереме кои зборови не ги кажал Господ?“

²²Еве како ќе ги дознаете: ако пророкот говори од името на Господ, и зборовите не се збиднат и не се исполнат, тогаш Господ не ги кажал тие зборови, туку ги кажал пророкот поради својата дрскост, — не плаши се од него.