Read Свето Писмо: Стандардна Библија 2006 (со девтероканонски книги) Повторени закони 19 Bible Online

Повторени закони 19 - Свето Писмо: Стандардна Библија 2006 (со девтероканонски книги) bible

Повторени закони 19

¹Кога Господ, твојот Бог, ќе ги уништи народите, чија земја ти ја дава Господ, твојот Бог, и ја наследиш по нив, и се населиш во градовите нивни, и со куќите нивни,

²тогаш оддели три града во земјата своја, што Господ, твојот Бог, ти ја дава во наследство;

³изгради си пат и раздели ја на три дела сета земја, што Господ, твојот Бог, ти ја дава во наследство; тие да служат за засолниште на секој убиец.

⁴А еве кој убиец може да се засолни таму и да остане жив: оној што ќе убие ближен свој без умисла, и да не му бил непријател порано;

⁵оној што ќе отиде со другарот свој во шума да собира дрва, па ја замавне секирата со рака, за да пресече дрво, и испадне сечилото од дршката, го погоди другарот негов, и тој умре, — таков нека се засолни во еден од тие градови, за да остане жив,

⁶за да не го подгони одмаздникот за крв со разјарено срце убиецот и да го стигне, па, ако патот биде долг, и го убие, иако тој не смее да се осуди на смрт, бидејќи не му бил непријател порано;

⁷затоа и ти заповедав, велејќи ти: оддели си три града.

⁸Кога пак Господ, твојот Бог, ќе ги прошири твоите предели, како што се беше заколнал на предците твои, и ти ја даде сета земја, што им ја беше ветил на предците твои,

⁹ако се трудиш да ги исполнуваш сите овие заповеди, што денес ти ги заповедам: да Го сакаш Господа, твојот Бог, и да одиш по Неговите патишта во сите денови, — тогаш кон тие три града додај уште три града,

¹⁰за да не се пролева невина крв во земјата твоја, што ти ја дава Господ, твојот Бог во наследство и за да не бидеш обвинет поради крв.

¹¹Но ако има некој човек кој е непријател на ближниот свој и го начека, па се нафрли на него и го истепа така, што тој умре, и избега во еден од оние градови,

¹²старешините на тој град да испратат, да го земат оттаму и да го предадат во рацете на одмаздникот за крв и да умре.

¹³Да не го поштеди окото твое: очисти ја крвта на невиниот од Израел, и ќе ти биде добро.

¹⁴Не ја преместувај меѓата на ближниот свој, поставена од прадедовците твои во твоето наследство, што си го добил во земјата, која Господ, твојот Бог, ти ја дава во владение.

¹⁵Не е доволен еден сведок против човек за каква и да било вина, престап или некој грев, со кој згрешил: при сведочењето на двајца или тројца сведоци се донесува решение.

¹⁶Ако против некого излезе неправеден сведок, обвинувајќи го за престап,

¹⁷и обајцата, кои се судат, нека застанат пред Господ, пред свештениците и пред судиите, што ќе се најдат во тие денови;

¹⁸и судиите нека ги испитаат добро, па ако оној сведок е лажлив сведок и лажно сведочи против братот свој,

¹⁹направете му го она што го беше намислил да му го направи на братот свој: така исчистете го злото од вашата средина.

²⁰И другите ќе чујат, па ќе се уплашат, и нема во иднина да прават такво зло кај вас.

²¹Да не го поштеди окото твое: душа за душа, око за око, заб за заб, рака за рака, нога за нога.