Read Свето Писмо: Стандардна Библија 2006 (со девтероканонски книги) Повторени закони 27 Bible Online

Повторени закони 27 - Свето Писмо: Стандардна Библија 2006 (со девтероканонски книги) bible

Повторени закони 27

¹Тогаш Мојсеј со старешините израелски му заповеда на народот, велејќи: „Пазете ги сите заповеди, што денес ви ги давам.

²И кога во оној ден ќе го минете Јордан и дојдете во земјата, која Господ, твојот Бог, ти ја дава, како дел, постави си големи камења и обели ги со вар;

³и напиши ги на нив сите зборови од твојот закон, штом ќе го преминеш, за да влезеш во земјата, која Господ, твојот Бог, ти ја дава, во земјата, каде што тече мед и млеко, како што им беше говорел Господ, твојот Бог, на твоите предци.

⁴Кога ќе го преминете Јордан, поставете ги тие камења, како што ви заповедам денес, на планината Евал и обелете ги со вар;

⁵и изгради таму жртвеник на Господ, твојот Бог, жртвеник од камења; да не ставаш на нив железо;

⁶жртвеникот на Господ, твојот Бог, изгради го од цели камења и принесувај врз него сепаленици на Господ, твојот Бог;

⁷принесувај и жртви за мир, и јади таму, и весели се пред Господ, твојот Бог;

⁸и врз тие камења напиши го многу јасно целиот овој закон.“

⁹Тогаш Мојсеј со свештениците левити му рече на целиот Израел, велејќи: „Внимавај и слушај, Израеле: ти денес стана народ на Господ, твојот Бог.

¹⁰И така, слушај го гласот на Господ, твојот Бог, и извршувај ги Неговите заповеди и наредби, што ти ги заповедам денес.“

¹¹И во тој ден му заповеда Мојсеј на народот, велејќи:

¹²„Кога ќе го минете Јордан, овие племиња треба да застанат на планината Гаризим, за да го благословат народот: Симеон, Левиј, Јуда, Исахар, Јосиф и Венијамин;

¹³а на планината Евал да застанат за да искажат проклетство овие: Рувим, Гад, Завулон, Дан и Нефталим.

¹⁴Левитите да го известат народот и да им кажат на сите Израелци со висок глас:

¹⁵‚проклет да е оној човек, кој ќе направи изрезан или излиен идол, одвратност пред Господ, работа на уметнички раце, па го стави на скришно место! Целиот народ да извика и да рече: амин!

¹⁶Проклет да е оној, што го навредува таткото свој или мајката своја! И целиот народ да каже: амин!

¹⁷Проклет да е оној, кој ја поместува меѓата на ближниот свој! И целиот народ нека рече: амин!

¹⁸Проклет да е оној, кој отстранува слеп човек од патот! И целиот народ нека каже: амин!

¹⁹Проклет да е оној, кој криво суди дојденец, сирак или вдовица! И целиот народ нека рече: амин!

²⁰Проклет да е оној, кој ќе легне со жената на својот татко, зашто тој го открил крајот од покривката на таткото свој! И целиот народ да каже: амин!

²¹Проклет да е оној, кој ќе легне со каков и да било добиток! И сиот народ нека рече: амин!

²²Проклет да е оној, кој ќе легне со сестрата своја, со татковата ќерка или со мајкината ќерка! И целиот народ да каже: амин!

²³Проклет да е оној, кој ќе легне со тештата своја! И целиот народ нека рече: амин!

²⁴Проклет да е оној, кој ќе го убие тајно ближниот свој! И целиот народ да каже: амин!

²⁵Проклет да е оној, кој зема поткуп, за да погуби душа и да пролее невина крв! И целиот народ нека рече: амин!

²⁶Проклет да е секој, кој не ќе ги исполни наредбите од овој закон и не ќе постапи според нив! И целиот народ да каже: амин!‘“