Read Свето Писмо: Стандардна Библија 2006 (со девтероканонски книги) Дела 24 Bible Online

Дела 24 - Свето Писмо: Стандардна Библија 2006 (со девтероканонски книги) bible

Дела 24

¹По пет дена слезе првосвештеникот Ананија со старешините и со некој си говорник Тертил, па излегоа пред намесникот, обвинувајќи го Павле.

²А кога го повикаа Павле, Тертил почна да го обвинува, велејќи:

³„Секогаш и насекаде со голема благодарност признаваме дека преку тебе, многупочитуван Феликсе, кај нас има полн мир, а преку грижите твои — на овој народ му се дели вистинска правда.

⁴Но, за да не ти одземеме многу време, те молам да нѐ ислушаш накратко со твојата кротост.

⁵Утврдивме дека овој човек е чума и дека крева бунтови против сите Јудејци по вселената и дека е предводник на назарејската ерес.

⁶Тој се обиде дури и храмот да го оскверни. Затоа ние го фативме и сакавме да му судиме според нашиот Закон;

⁷но заповедникот Лисиј дојде и со голема сила го истргна од рацете наши, и го испрати кај тебе,

⁸откако заповеда и ние, неговите обвинители, да дојдеме кај тебе. Ти ќе можеш сам да го испиташ и од него да дознаеш за што го обвинуваме ние.“

⁹И Јудејците потврдуваа дека е така.

¹⁰Намесникот му даде знак на Павле да зборува, а тој одговори: „Бидејќи знам дека од пред многу години си му судија на овој народ, со послободно срце ќе зборувам во моја одбрана.

¹¹Ти можеш да дознаеш дека нема повеќе од дванаесет дена откако се искачив во Ерусалим на поклонение.

¹²Но не ме најдоа ниту во храмот некому да зборувам, или бунт да кревам меѓу народот, ни по синагогите, ниту, пак, во градот.

¹³Ниту, пак, тие можат да го докажат она што сега ти зборуваат за мене.

¹⁴Но ти признавам дека според учењето, кое тие го нарекуваат ерес, Му служам на Бога на нашите татковци, дека верувам во сѐ што е напишано во Законот и во Пророците,

¹⁵дека се надевам на Бога, дека ќе има воскресение на мртвите, на праведните и на неправедните, кое и тие сами го очекуваат.

¹⁶А затоа и сам се трудам секогаш да имам чиста совест пред Бога и пред луѓето.

¹⁷По многу години дојдов да му донесам на мојот народ милостина и приноси.

¹⁸Тогаш, кога се бев очистил, ме најдоа во храмот, ни со народ, ниту со немир,

¹⁹некои азиски Јудејци, кои требаше да се претстават пред тебе и да ме обвинат, ако имаат нешто против мене.

²⁰Или, пак, тие сами да кажат дали во мене нашле некаква неправда, кога се бев јавил пред Синедрионот, —

²¹освен само овие зборови, кои, застанат пред нив, гласно ги изговорив: ‚Заради воскресението на мртвите ме судите вие денес.‘“

²²Кога го слушна тоа Феликс, тој го одложи делото, бидејќи добро знаеше за тоа учење, и рече: „Ќе го разгледам делото кога ќе дојде заповедникот Лисиј.“

²³И му заповеда на стотникот да го пази Павле, но да му дава извесна слобода, и да не запира никого од неговите блиски да му служат, или да доаѓаат кај него.

²⁴По неколку дена дојде Феликс со жената своја Друзила која беше Јудејка, па го повика Павле и слушаше од него за верата во Христос Исус.

²⁵А кога Павле зборуваше за правда, за воздржување и за идниот суд, Феликс се уплаши и одговори: „Сега оди си, а кога ќе најдам време, ќе те повикам.“

²⁶При ова се надеваше дека Павле ќе му даде пари за да го пушти; затоа често го повикуваше и разговараше со него.

²⁷Но кога изминаа две години, Феликса го замени Порциј Фест. И бидејќи сакаше да им угоди на Јудејците, Феликс го остави Павле во окови.