Read Свето Писмо: Стандардна Библија 2006 (со девтероканонски книги) Римјаните 11 Bible Online

Римјаните 11 - Свето Писмо: Стандардна Библија 2006 (со девтероканонски книги) bible

Римјаните 11

¹И затоа, ви велам: Зар Бог го отфрли Својот народ? Никако! Зашто и јас сум Израелец, од семето Авраамово, од коленото Венијаминово.

²Бог не го отфрли Својот народ, кој однапред го одбра. Или, пак, не знаете што кажува Писмото за Илија, како тој Му се пожали на Бог Израелов, велејќи:

³„Господи, ги убија пророците Твои и ги раскопаа жртвениците Твои; јас останав сам, и сакаат да ми ја земат душата.“

⁴А како му вели Божјиот одговор: „Си оставив седум илјади мажи, кои не ги свиткаа колената пред Ваал.“

⁵Така и во сегашно време има еден остаток избран по благодат.

⁶Но, ако е по благодат, не е веќе по дела, зашто тогаш благодатта не би била благодат. [2]

⁷И што тогаш? Израел не го доби она што го бараше; избраните, пак, го добија, а другите се закоравија,

⁸како што е напишано: „Бог им даде дух што не чувствува: очи да не гледаат и уши да не слушаат, сѐ до денешниов ден.“

⁹И Давид вели: „Трпезата нивна да им биде стапица, клопка, соблазна и отплата;

¹⁰да им се замрачат очите нивни за да не гледаат, и грбот нивни да им се свитка засекогаш.“

¹¹Ви велам пак: зар се сопнаа за да паднат? Не! Но со нивниот престап дојде спасението за незнабошците, за да се возбуди во нив ревност.

¹²Ако, пак, нивниот престап значи богатство за светот, и нивниот намален број — богатство за незнабошците, колку повеќе ќе значи нивната потполност.

¹³Вам, незнабошци, ви велам; до колку сум јас апостол на незнабошците, ја прославувам својата служба,

¹⁴та некако да возбудам ревност во својот род по тело, и некого од нив да спасам.

¹⁵Зашто, ако нивното отфрлање значи измирување за светот, тогаш што ли друго ќе значи нивното примање, ако не оживување од мртвите?

¹⁶Ако првиот дел од тестото е свет, тогаш свето е и целото тесто: и ако е коренот свет, свети се и гранките.

¹⁷Ако, пак, некои од гранките се скршени, а ти, кој си дива маслинка, си бил прикалемен на нивното место и си станал заедно со нив соучесник во сочниот корен на маслинката,

¹⁸не биди горделив пред гранките! А ако сепак, се возгордееш, треба да знаеш дека ти не го држиш коренот, туку коренот тебе!

¹⁹Но ти тогаш ќе кажеш: гранките беа откршени за да бидам јас прикалемен.

²⁰Добро. Тие поради неверие беа откршени, а ти поради вера се држиш: немој да бидеш горделив, туку имај страв.

²¹Зашто, ако Бог не ги поштедил природните гранки, нема ни тебе да те поштеди.

²²Гледај ја, пак, Божјата благост и строгост: строгост кон отпаднатите, а благост кон тебе, ако издржиш во благоста; во спротивно, и ти ќе бидеш отсечен.

²³Но, тие, ако не останат во неверието, ќе бидат прикалемени, зашто Бог има моќ пак да ги прикалеми.

²⁴Зашто, ако си ти откинат од маслинка која е по природа дива, и против природата си прикалемен на питома маслинка, тогаш колку полесно ќе бидат прикалемени на својата маслинка оние кои по природа потекнуваат од неа.

²⁵Сакам, браќа, за да не си помислите во себе дека сте мудри, да ја знаете оваа тајна: дека закоравувањето само со еден дел падна врз Израел, додека да настапи потполноста на незнабошците.

²⁶И така целиот Израел ќе биде спасен, како што е напишано: „Ќе дојде од Сион Ослободителот и ќе ја одврати безбожноста од Јаков.

²⁷И тоа им е ним завет од Мене кога ќе ги одземам нивните гревови.“

²⁸Со оглед на Евангелието, тие се непријатели Божји поради вас; но со оглед на изборот, тие се возљубени од Бога заради татковците,

²⁹зашто даровите и повикот Божји се неотповикливи.

³⁰Како што и вие некогаш бевте непослушни кон Бога, а сега се здобивте со милост, поради нивната непослушност,

³¹така и тие сега станаа непослушни, поради вашето помилување, та и самите да се здобијат со милост.

³²Зашто Бог ги затвори сите со непослушност, па кон сите да покаже милост.

³³О, длабочино на богатство, мудрост и знаење Божјо! Колку се несфатливи Неговите судови и неистражливи Неговите патишта!

³⁴Зашто, кој ја познал мислата на Господ? Или, кој Му бил советник?

³⁵Или, кој однапред Му дал нешто за да му биде отплатено?

³⁶Зашто, сѐ е од Него, според Него и за Него. Нему слава во вечни векови. Амин!