Read Свето Писмо: Стандардна Библија 2006 (со девтероканонски книги) Римјаните 13 Bible Online

Римјаните 13 - Свето Писмо: Стандардна Библија 2006 (со девтероканонски книги) bible

Римјаните 13

¹Секоја душа да им се потчинува на претпоставените власти, зашто нема власт што не е дадена од Бога, и оние што ги има се одредени од Бога.

²Затоа, оној што се противи на власта, тој се противи на Божјата наредба. А оние, што се противат, ќе паднат под осуда.

³Зашто, началниците не се страшни за добрите дела, туку за лошите; сакаш ли, пак, да не се плашиш од власта, тогаш прави добри дела, па ќе добиеш и пофалба од неа;

⁴зашто таа е служител Божји за твое добро. Ако, пак, правиш зло, тогаш страхувај, бидејќи таа не носи залудо оружје; таа е служител Божји и со гнев се одмаздува на оној што прави зло.

⁵Затоа е нужно да се покорувате, и тоа не само поради страв, туку и поради совеста своја.

⁶Затоа и данок плаќате, зашто тие се Божји службеници, и со тоа постојано се занимаваат.

⁷И така, дајте секому што сте му должни: кому сте му должни данок — нека му се даде данок; кому царина — царина; кому страхопочит — страхопочит; кому чест — чест.

⁸И не должете никому ништо освен да се сакате еден со друг; зашто оној што го љуби ближниот, го исполнува Законот.

⁹Бидејќи заповедите: „Не прави прељуба, не убивај, не кради, не сведочи лажно, не барај туѓо!“, и секоја друга заповед се содржат во овие зборови: „Љуби го ближниот како самиот себеси!“

¹⁰Љубовта не му прави зло на ближниот; и така, љубовта е исполнување на Законот.

¹¹И тоа правете го, знаејќи го ова време: веќе дојде часот да се разбудите од сонот, зашто спасението е сега поблиску до нас отколку кога поверувавме.

¹²Ноќта одминува, а денот се приближи; да ги отфрлиме, пак, сите дела на мракот и да се облечеме во оружјето на светлината.

¹³Да живееме пристојно како дење — не во срамни гоштевки и пијанство, не во блуд и нечистотија, ниту, пак, во препирка и завист;

¹⁴туку облечете се во Господ Исус Христос, и грижата за телото не претворајте ја во страсти.