Read Свето Писмо: Стандардна Библија 2006 (со девтероканонски книги) Римјаните 15 Bible Online

Римјаните 15 - Свето Писмо: Стандардна Библија 2006 (со девтероканонски книги) bible

Римјаните 15

¹Ние, силните, должни сме да ги поднесуваме слабостите на немоќните, и да не си угодуваме на себеси.

²Секој од нас должен е на својот ближен да му угодува со она што е добро за неговата надградба.

³Зашто и Христос не си угоди на Себе Самиот, туку како што е напишано: „Подбивите на оние што Ти се подбиваа, паѓаат врз Мене.“

⁴А сѐ што беше порано напишано, за наша поука беше напишано, та преку трпението и преку утехата од Писмата да имаме надеж.

⁵А и Бог на трпението и утехата да ви даде да бидете во едномислие меѓу себе, според примерот на Христос Исус,

⁶та еднодушно и со една уста да Го славите Бога и Отецот на нашиот Господ Исус Христос.

⁷Затоа примајте се еден со друг, како што и Христос ве прими, заради славата Божја.

⁸Но велам дека Исус Христос стана служител на обрезаните поради Божјата вистина, за да ги потврди ветувањата дадени на татковците,

⁹а, пак, незнабошците да Го прослават Бога за милосрдието, како што е напишано: „Затоа Те прославувам, Господи, меѓу незнабошците и ќе Го воспеам Твоето име.“

¹⁰И понатаму се вели: „Развеселете се, незнабошци, со Неговиот народ!“

¹¹И понатаму: „Фалете Го Господ сите незнабошци, и прославете Го, сите народи!“

¹²Исаија, исто така вели: „Ќе постои коренот Јесеев и Издигнатиот од него ќе владее над народите; на Него ќе се надеваат народите.“

¹³А Бог на надежта нека ве исполни со сета радост и мир во верата, та преку силата на Светиот Дух вашата надеж да се преумножува.

¹⁴И јас сум уверен за вас, браќа мои, дека и вие сте полни со добрина, исполнети со секакво знаење и дека можете да се поучувате еден со друг.

¹⁵Но ви пишав, браќа, нешто малку послободно, за да ве потсетам со благодатта што Бог ми ја даде,

¹⁶за да Му бидам служител на Исус Христос меѓу незнабошците и свештенодејствено да го извршувам Божјото Евангелие, за да бидат незнабошците благопријатен принос, осветен од Светиот Дух.

¹⁷И така, со тоа можам да се пофалам во Исус Христос кај Бога,

¹⁸зашто не се осмелувам да говорам за она што Христос не го извршил преку Мене со зборови и дела,

¹⁹со силата на знаци и чуда, со силата на Божјиот Дух, која ги води незнабошците кон послушност во верата, така што Евангелието Христово го распространува од Ерусалим и неговата околина и сѐ до Илирик.

²⁰И така, се погрижив да го проповедам Евангелието не таму каде што името Христово беше веќе познато, за да не ѕидам врз туѓ темел.

²¹Но, како што е напишано: „Оние, на кои не им е јавено за Него, ќе видат; и оние што не беа чуле, ќе разберат.“

²²Токму тоа многупати ме попречуваше да дојдам кај вас.

²³Сега, пак, бидејќи нема веќе место за мојата работа во овие земји, а уште од пред многу години копнеев да дојдам кај вас,

²⁴кога ќе тргнам за Шпанија, се надевам дека ќе ве видам на минување и дека натаму вие ќе ме испратите, откако најнапред ќе ви се порадувам.

²⁵А сега одам во Ерусалим за да им послужам на светиите,

²⁶зашто Македонија и Ахаја одлучија да дадат некаков прилог за сиромашните светии во Ерусалим.

²⁷Тие така тоа го одлучија, а и должни им се. Бидејќи, ако незнабошците станаа соучесници во нивните духовни блага, тогаш тие се должни ним да им служат со материјални блага.

²⁸А откако ќе го направам ова и ќе им го запечатам овој плод, преку вашата земја ќе заминам за Шпанија.

²⁹А знам дека, кога ќе дојдам кај вас, ќе дојдам со полн благослов на Христовото Евангелие.

³⁰Браќа, ве молам поради нашиот Господ Исус Христос и поради љубовта на Духот, помагајте ми со своите молитви кон Бога за мене,

³¹за да се избавам од оние што не веруваат, кои се во Јудеја, и моето служење во Ерусалим да им биде благопријатно на светиите;

³²та радосен да дојдам кај вас со Божјата волја и да се успокојам со вас.

³³А Бог на мирот нека биде со сите вас. Амин!