Read Свето Писмо: Стандардна Библија 2006 (со девтероканонски книги) Римјаните 2 Bible Online

Римјаните 2 - Свето Писмо: Стандардна Библија 2006 (со девтероканонски книги) bible

Римјаните 2

¹И така, немаш изговор, о човеку, кој и да си ти, зашто со каков суд судиш друг, со таков се осудуваш сам, бидејќи ти, кој судиш, го правиш истото.

²А знаеме дека Божјиот суд, кој, паѓа врз оние кои вршат такви работи е според вистината.

³Зар мислиш, о човеку, дека ќе го избегнеш Божјиот суд ти, кој ги осудуваш оние што прават такви работи, какви што правиш и сам?

⁴Или, пак, го презираш богатството на Божјата благост, стрпливост и долготрпеливост, не разбирајќи дека Божјата благост те води кон покајување?

⁵Но, поради твојата тврдокорност и непокајаното срце си собираш гнев за денот на гневот, кога ќе се открие праведниот суд од Бога,

⁶Кој секому ќе му даде според неговите дела:

⁷живот вечен на оние кои со трпение во добрите дела се стремат кон слава, чест и нераспадливост;

⁸јарост, пак, и гнев на оние што ѝ се непокорни на вистината, а ѝ се покоруваат на неправдата.

⁹Неволја и мака за секоја човечка душа која прави зло, пред сѐ за Јудеец, а исто така и за Елин;

¹⁰слава и чест и мир на секој што прави добро, пред сѐ за Јудеец, а исто така и за Елин!

¹¹Зашто Бог не е пристрасен.

¹²Оние што згрешиле без Закон, без Закон ќе загинат; а оние што згрешиле под Закон, според Законот ќе бидат и судени,

¹³бидејќи пред Бога не се праведни оние што го слушаат Законот, туку ќе се сметаат за праведни само оние што постапуваат според Законот.

¹⁴Зашто секогаш кога незнабошците, кои немаат Закон, природно ги извршуваат одредбите на Законот, тогаш тие, иако немаат Закон, се Закон на самите себе;

¹⁵тие докажуваат дека делото на Законот е запишано во нивните срца, за што сведочи и нивната совест, а и нивните внатрешни размислувања, со кои меѓусебно се обвинуваат или одбрануваат,

¹⁶за оној ден, кога, според моето Евангелие, Бог преку Исус Христос ќе ги суди тајните на луѓето.

¹⁷Ете, ти се нарекуваш Јудеец, и се потпираш на Законот, и со Бога се фалиш,

¹⁸и ја знаеш волјата Негова, и повеќе разбираш што е подобро, зашто се поучуваш од Законот,

¹⁹и уверен си дека си водач на слепци, а светлина на оние што се во мрак;

²⁰наставник на неразумни, учител на младината, зашто образец на знаењето и вистината имаш во Законот.

²¹Но, како е можно тоа да учиш други, а себе самиот да не се учиш?

²²Ти, кој проповедаш да не се краде, а крадеш; кој велиш да не се врши прељуба, а прељубодејствуваш; ти, кој се гнасиш од идолите, а крадеш од храмовите;

²³ти, кој се фалиш со Законот, а престапувајќи го Законот, зарем не Го срамотиш Бога?

²⁴„Зашто поради вас името Божјо се хули меѓу незнабошците“, — така стои напишано.

²⁵Обрезанието е навистина полезно, но ако го извршуваш Законот. Ако, пак, правиш престапи против Законот, обрезанието твое станува необрезание.

²⁶И така, ако необрезаниот ги пази одредбите на Законот, тогаш нема ли неговото необрезание да се смета како обрезание?

²⁷И необрезаниот по тело, извршувајќи го Законот, нема ли да те осуди тебе, кој и покрај Писмо и обрезание си станал престапник на Законот?

²⁸Зашто не е прав Јудеец оној, кој е таков по надворешност, ниту право обрезание она, кое е надворешно, врз телото,

²⁹туку оној, кој е внатрешно таков, и она обрезание, што е во срцето, по дух, а не по буква. Неговата пофалба не потекнува од луѓето, туку од Бога.