Read Свето Писмо: Стандардна Библија 2006 (со девтероканонски книги) Галатјаните 3 Bible Online

Галатјаните 3 - Свето Писмо: Стандардна Библија 2006 (со девтероканонски книги) bible

Галатјаните 3

¹О неразумни Галатјани! Кој ве маѓепса (та не се покорувате на вистината) вас, пред чии очи Исус Христос беше јасно насликан распнат меѓу вас?

²Само ова сакам да го дознаам од вас: преку делата на Законот ли го добивте Духот или преку пораката на верата?

³Толку ли сте неразумни? Откако почнавте со Духот, со телото ли сега завршувате?

⁴Зарем залудо толку многу претрпевте? Да беше само залудо!

⁵Оној, пак, Кој ви Го дарува Духот и прави меѓу вас чудеса, преку делата на Законот ли го прави тоа, или преку пораката на верата?

⁶Така, Авраам Му поверува на Бога, и тоа му се сметаше за праведност.

⁷Знајте, пак, дека оние што се потпираат на верата, се синови Авраамови.

⁸И Писмото, предвидувајќи дека Бог преку вера ги оправдува незнабошците, однапред му благовести на Авраам: „Во тебе ќе бидат благословени сите народи.“

⁹И така, оние што веруваат, се благословени заедно со верниот Авраам;

¹⁰а сите оние, што се од делата на Законот, под клетва се. Зашто е напишано: „Проклет да е секој кој не исполнува постојано сѐ што е напишано во книгата на Законот!“

¹¹А дека преку Законот никој не се оправдува пред Бога, се знае, зашто „Праведниот ќе живее преку верата.“

¹²А Законот не е од верата, туку зборува: „Кој ќе ги исполни овие работи, тој ќе биде жив преку нив.“

¹³Христос нѐ откупи од проклетството на Законот, откако поради нас стана проклетство, бидејќи е напишано: „Секој да е проклет што виси на дрво!“,

¹⁴така што благословот даден на Авраам да дојде преку Исус Христос врз незнабошците, за да Го добиеме ветениот Дух преку верата.

¹⁵Браќа, зборувам како човек: и утврдениот човечки завет никој веќе не го растура ниту му додава нешто.

¹⁶Но ветувањата му беа дадени на Авраам и на семето негово. Не е речено: „И на семињата“, како за мнозина, туку како за еден: „И на семето твое“, кое е Христос.

¹⁷Ова сакам да го кажам: Заветот што Бог го даде не може да биде обезвреден од Законот, кој е настанат четиристотини и триесет години подоцна, така што ветувањето би можело да ја изгуби силата.

¹⁸Зашто, ако наследството е добиено по Законот, тоа веќе не е според ветувањето; а на Авраам Бог му го дари по ветување.

¹⁹Зошто е, пак, даден Законот? Тој е додаден поради престапите, додека не дојде семето, на кое се однесува ветувањето, и е предаден преку ангели, преку рака на посредник.

²⁰Но посредникот не може да биде само посредник на еден, а Бог е еден.

²¹Па така, Законот противен ли е на Божјите ветувања? Никако! Зашто, ако беше даден закон, што ќе можеше да животвори, тогаш навистина оправданието ќе произлегуваше од Законот.

²²Но Писмото сите ги затвори под грев, па преку верата во Исус Христос да им се даде ветеното на оние кои веруваат.

²³Пред да дојде верата, ние бевме под стража на Законот, заклучени за верата која требаше да се открие.

²⁴И така, Законот беше за нас воспитувач да нѐ доведе до Христос, за да бидеме оправдани преку верата;

²⁵а откако дојде верата, ние веќе не сме под раководство на воспитувач.

²⁶Зашто сите сте синови Божји преку верата во Христос Исус;

²⁷сите, што сте крстени во Христос, во Христос се облековте.

²⁸Нема веќе ни Јудејци, ни Елини, ни роб, ни слободен; нема машко — женско; зашто сите вие сте едно во Христос Исус.

²⁹А, ако сте, пак, вие Христови, тогаш сте Авраамово семе, и по ветување наследници.