Read Свето Писмо: Стандардна Библија 2006 (со девтероканонски книги) Галатјаните 4 Bible Online

Галатјаните 4 - Свето Писмо: Стандардна Библија 2006 (со девтероканонски книги) bible

Галатјаните 4

¹Но ви велам: наследникот, додека е млад, со ништо не се разликува од робот, макар што е господар над сѐ;

²туку е под настојници и чувари до определениот рок од неговиот татко.

³Па така и ние, додека бевме малолетни, бевме поробени од стихиите на светот;

⁴но, кога се исполни времето, Бог Го испрати Својот Син, Кој се роди од жена и се потчини на Законот,

⁵за да ги откупи оние што се под Закон, та да го примиме посинувањето.

⁶А бидејќи вие сте синови, Бог Го испрати Духот на Својот Син во срцата ваши, Кој вика: Ава, Оче!

⁷Затоа не си веќе роб, туку син; ако си, пак, син, тогаш си и наследник Божји преку Исус Христос.

⁸Но тогаш, бидејќи Бога не Го познававте, им служевте на богови кои по својата природа не се богови;

⁹а сега, откако Го познавте Бога, или, подобро, откако Бог ве позна, како сега повторно се враќате кон слабите и бедни стихии, на кои сакате одново да им служите?

¹⁰Внимавате на деновите, месеците, времињата, годините.

¹¹Се плашам за вас, да не сум се трудел меѓу вас попусто.

¹²Ве молам, браќа, станете како мене, затоа што и јас станав како вас. Вие со ништо не сте ме навредиле:

¹³знаете дека, кога за првпат ви проповедав, бев телесно немоќен,

¹⁴и при сето тоа, вие не го презревте искушението на моето тело, ниту се погнасивте од него, туку ме примивте како ангел Божји, како Исус Христос.

¹⁵Каде ви е сега радоста ваша? Сведочам за вас дека кога би било можно, и очите свои би ги извадиле и би ми ги дале.

¹⁶И затоа ли станав ваш непријател, бидејќи ви ја зборував вистината?

¹⁷Тие не ревнуваат за вас добро, туку сакаат да ве одвојат од мене, та вие за нив да ревнувате.

¹⁸Добро е секогаш да ревнувате во доброто, а не само кога сум меѓу вас.

¹⁹Чеда мои, за кои сум пак во родилни маки, додека не се обликува во вас Исус Христос,

²⁰сега би сакал да бидам меѓу вас и да ви се обратам со поинаков тон, бидејќи сум во недоумица за вас.

²¹Кажете ми, вие, што сакате да бидете под Законот: зарем не го слушате Законот?

²²Зашто е напишано дека Авраам имаше двајца синови, еден од слугинката, а друг од слободната.

²³Но оној што беше од слугинката, се роди по тело; а оној што беше од слободната — по ветување.

²⁴А ова е речено сликовито: двете жени се двата завета: едниот од Синајската Гора, која раѓа за ропство; а тоа е Агара.

²⁵Бидејќи Агара значи Синајска Гора во Арабија, а соодветствува на сегашниот Ерусалим и робува со децата свои;

²⁶а горниот Ерусалим е слободен: тој е мајка на сите нас.

²⁷Зашто е напишано: „Развесели се неплодна, ти што не раѓаш; воскликни и извикај ти, која не си искусила породилни маки; бидејќи напуштената има многу повеќе деца од онаа која има маж.“

²⁸Вие, пак, браќа, сте како Исак, чеда на ветувањето.

²⁹Но, како што тогаш, оној што се роди по тело, го гонеше родениот по дух, така е и сега.

³⁰А што зборува Писмото? „Истерај ја робинката и синот нејзин, зашто синот на робинката нема да биде наследник заедно со синот на слободната!“

³¹И така, браќа ние не сме деца на робинката, туку на слободната.