Read Свето Писмо: Стандардна Библија 2006 (со девтероканонски книги) Галатјаните 5 Bible Online

Галатјаните 5 - Свето Писмо: Стандардна Библија 2006 (со девтероканонски книги) bible

Галатјаните 5

¹Стојте во слободата, со која Христос нѐ ослободи, и не се подавајте пак под ропски јарем!

²Еве, јас, Павле, ви велам: ако се обрезувате, Христос ништо нема да ви помогне.

³А му сведочам пак на секој човек што се обрезува дека тој е должен да го почитува целиот Закон.

⁴Вие, што посакавте да се оправдувате со Законот, Го изгубивте Христос, отпаднавте од благодатта;

⁵а ние се надеваме и очекуваме оправдание од верата преку Духот.

⁶Зашто во Христос Исус ниту обрезанието има сила, ниту необрезанието, туку верата, која дејствува преку љубовта.

⁷Вие трчавте добро: кој ви попречи да не се покорувате на вистината?

⁸Тоа убедување не е од Оној Кој ве повика.

⁹Малку квас го потквасува целото тесто.

¹⁰Јас сум уверен за вас во Господ дека вие нема да мислите инаку; а оној, кој ве збунува, — кој и да бил, — ќе претрпи осуда.

¹¹А јас, браќа, ако обрезанието уште го проповедам, тогаш за што ќе ме гонат? Тогаш би исчезнала соблазната од крстот.

¹²О, да беа отсечени оние што ве бунеа!

¹³Вие, браќа, повикани сте кон слобода; но слободата ваша да не ви служи како повод за угодување на телото, туку со љубов служете си еден на друг.

¹⁴Зашто, целиот Закон се извршува во еден збор, односно: сакај го ближниот како самиот себе.

¹⁵А ако, пак, меѓу себе се гризете и јадете, пазете да не се истребите еден со друг.

¹⁶Ви велам: живејте по Духот, и нема да им угодувате на телесните страсти.

¹⁷Зашто, телото сака противни работи на духот, а духот — противни на телото; тие се спротивни еден на друг, за да не го правите она што сакате.

¹⁸Ако ве води Духот, вие не сте под Законот.

¹⁹Делата на телото се познати. Тие се: блудство, нечистота, бесрамност,

²⁰служење на идоли, маѓии, непријателство, кавги, ревнување, гнев, раздори, расцепи,

²¹зависти, пијанство, пирови и други слични работи; однапред ви велам, како што ви реков и порано, дека оние што го прават тоа, нема да го наследат царството Божјо.

²²А плодот на Духот е: љубов, радост, мир, долготрпеливост, благост, добрина, верност,

²³кротост, воздржливост. Против такви нема закон.

²⁴Оние, пак, кои се Христови, го распнаа телото свое со страстите свои и похотите.

²⁵Ако живееме со Дух, по Духот сме должни и да постапуваме.

²⁶Да не бараме лажна слава, еден друг да не се предизвикуваме, еден на друг да не си завидуваме.