Read Свето Писмо: Стандардна Библија 2006 (со девтероканонски книги) Галатјаните 6 Bible Online

Галатјаните 6 - Свето Писмо: Стандардна Библија 2006 (со девтероканонски книги) bible

Галатјаните 6

¹Браќа, и да падне човек во некаков грев, вие духовните поправајте го таков со духот на кротоста, пазејќи се и вие да не бидете искушани.

²Поднесувајте го товарот еден на друг и исполнувајте го така законот Христов.

³Зашто оној, кој сам себе се смета за нешто, а не е ништо, тој се мами самиот себе.

⁴Секој нека си ги испита делата свои и тогаш ќе има пофалба пред себе самиот, а не пред друг.

⁵Зашто секој ќе го понесе својот товар.

⁶А оној што се учи на словото, нека му дава дел од секое добро на оној што го учи.

⁷Не лажете се: Бог не е за подигрување. Што ќе си посее човекот, тоа и ќе си жнее.

⁸Кој сее во телото свое, од телото ќе пожнее погибел; а кој сее во духот, од духот ќе пожнее вечен живот.

⁹Кога правиме добро, тоа нека не ни биде здодевно, зашто во свое време ќе пожнееме, ако не се измориме.

¹⁰И така, додека имаме време, да им правиме добро на сите, а најмногу на своите по вера.

¹¹Гледајте со колку големи букви ви напишав со својата рака.

¹²Оние што сакаат да се фалат по тело, тие ве принудуваат да се обрезувате само за да не бидат гонети поради крстот Христов.

¹³Зашто, и оние што се обрезуваат, сами не го почитуваат Законот, а сакаат вие да се обрезувате за да се пофалат со вашето тело;

¹⁴а мене, да не ми даде Господ да се фалам со ништо друго, освен со крстот на нашиот Господ Исус Христос, преку Кого за мене светот е распнат, а и јас за светот.

¹⁵Зашто во Исус Христос ниту обрезанието има некаква сила, ниту необрезанието, туку новото создание.

¹⁶На оние што постапуваат и по тоа правило, и отсега натаму нека биде мир и милост, ним и на Израел Божји!

¹⁷И така, никој да не ми досадува веќе, зашто јас ги носам на своето тело белезите на Исус.

¹⁸Благодатта на нашиот Господ Исус Христос, нека биде со вашиот дух, браќа. Амин!