Read Свето Писмо: Стандардна Библија 2006 (со девтероканонски книги) Ефесјаните 2 Bible Online

Ефесјаните 2 - Свето Писмо: Стандардна Библија 2006 (со девтероканонски книги) bible

Ефесјаните 2

¹И вас, кои бевте мртви поради вашите престапи и гревови,

²во кои живеевте некогаш според животот на овој свет, согласно со кнезот на воздухот, односно на духот, кој сега дејствува во синовите на неверието,

³меѓу кои и ние сите некогаш живеевме според телесните желби, извршувајќи ги похотите на телото и на помислите, и по природа бевме како и другите, чеда на гневот.

⁴Но Бог, Кој е богат со милост, поради големата Негова љубов, со која нѐ засака,

⁵иако бевме мртви поради гревовите наши, нѐ оживеа во Христос

⁶и нѐ воскресна со Него и нѐ постави на небесата во Христос Исус,

⁷за да им го покаже на идните векови преизобилното богатство на Својата благодат во добрина кон нас преку Христос Исус.

⁸Зашто по благодат сте спасени преку верата; и тоа не е од вас — туку дар Божји!

⁹Не е од дела, за да не се пофали некој.

¹⁰Зашто ние сме Негова творба, создадени во Христос Исус за добри дела што Бог ги предодредил уште од порано да живееме во нив.

¹¹Затоа помнете, вие, кои некогаш по тело бевте незнабошци, и наречени необрезани од таканаречените обрезани со телесно обрезание, правено со раце,

¹²дека во она време бевте без Христос, отстранети од општеството на Израел, без право на учество во заветите на ветеното, без надеж и безбожници во светот;

¹³но сега, во Христос Исус, вие, кои некогаш бевте далеку, станавте блиски преку крвта Христова.

¹⁴Зашто Тој е нашиот мир, Кој од двата народи направи еден и ја разруши преградата што беше меѓу нив,

¹⁵откако со телото Свое го уништи непријателството, а законот на заповедите и одредбите го обессили, за да создаде во Себе од двата еден нов човек, воспоставувајќи мир,

¹⁶и обата во едно тело да ги помири со Бога преку крстот, откако го уништи непријателството во себе.

¹⁷И, откако дојде, Тој ви благовести мир вам далечни и блиски,

¹⁸зашто преку него и едните и другите имаме пристап кај Отецот во еден Дух.

¹⁹И така, вие веќе не сте туѓи и придојдени, туку сте им сожители на светиите и членови на Божјото семејство,

²⁰зашто се утврдивте на темелите поставени од апостолите и пророците, имајќи Го како камен темелник Самиот Исус Христос,

²¹врз Кого целата зграда, стројно зглобена, прераснува во свет храм на Господ;

²²врз Кого и вие ќе се соѕидате во живеалиште Божјо преку Духот.