Read Свето Писмо: Стандардна Библија 2006 (со девтероканонски книги) Филипјаните 4 Bible Online

Филипјаните 4 - Свето Писмо: Стандардна Библија 2006 (со девтероканонски книги) bible

Филипјаните 4

¹И така, браќа мои возљубени и многу пожелни, радост моја и венец, стојте цврсто во Господ, возљубени!

²Ја молам Еводија, ја молам и Синтихија да бидат едномислени во Господ;

³а те молам и тебе, искрен сотрудниче, помагај им на оние што се грижеа во Евангелието заедно со мене и со Климент и со другите мои сотрудници, чии имиња се во Книгата на животот.

⁴Радувајте се секогаш во Господ, и пак ќе речам: радувајте се!

⁵Кротоста ваша нека им биде позната на сите луѓе! Господ е близу!

⁶За ништо не грижете се, туку во сѐ преку молитва и молба со благодарност изнесувајте ги пред Бога своите барања,

⁷и мирот Божји, што надвишува секој ум, ќе ги запази вашите срца и вашите мисли во Исус Христос.

⁸Понатаму, браќа мои, на она што е вистинско, што е чесно, што е праведно, што е чисто, што е љубезно, што е достојно за слава, на она што е добродетел, што е за пофалба, само на тоа мислете!

⁹И она што го научивте, примивте, чувте и видовте во мене, тоа правете го, — и Бог на мирот ќе биде со вас!

¹⁰Јас се зарадував необично многу во Господ, зашто најпосле расцветавте во вашата грижа за мене; вие и порано се грижевте за мене, но немавте згодна пригода.

¹¹Ова го велам не поради скудност од нешто, бидејќи се научив да се задоволувам со она што го имам.

¹²Знам да живеам и во скудност, знам да живеам и во изобилство; научен сум на сѐ и сешто, и сит да бидам, и глад да трпам, и во изобилие да сум и во немаштија.

¹³Сѐ можам преку Исус Христос, Кој ме крепи.

¹⁴Но, добро направивте што зедовте учество во мојата скрб.

¹⁵А знаете и вие, Филипјани, дека во почетокот на проповедањето на Евангелието, кога отпатував од Македонија, немаше ниту една црква нешто да ми даде или нешто да примам освен од вас;

¹⁶зашто и во Солун, еднаш, и по вторпат ми пративте нужни работи.

¹⁷Ова го велам не дека сакам да ми давате, туку го барам плодот кој се умножува во ваша полза.

¹⁸Добив сѐ и имам во изобилие, се пренаполнив со блага, кога го примив од вас испратениот дар преку Епафродит, кој е мирис сладок, жртва пријатна, благоугодна на Бога.

¹⁹Мојот Бог, по Своето богатство, нека ја исполни секоја ваша потреба, за слава преку Христос Исус.

²⁰А на Бога, нашиот Отец, слава во вечни векови. Амин!

²¹Поздравете го секој светија во Христос Исус! Ве поздравуваат браќата што се со мене.

²²Ве поздравуваат сите светии, а особено оние што се од Цезаревиот дом.

²³Благодатта на нашиот Господ Исус Христос нека биде со сите вас. Амин!