Read Свето Писмо: Стандардна Библија 2006 (со девтероканонски книги) Колосјаните 3 Bible Online

Колосјаните 3 - Свето Писмо: Стандардна Библија 2006 (со девтероканонски книги) bible

Колосјаните 3

¹И така, ако сте воскреснале заедно со Христос, барајте го она што е горе, каде што Христос седи оддесно на Бога;

²мислете за небесното, а не за земното.

³Зашто вие умревте, и вашиот живот е сокриен со Христос во Бога.

⁴А кога ќе се јави Христос, вашиот живот, тогаш и вие ќе се јавите со Него во слава.

⁵Затоа умртвете ги органите од земната природа во вас, односно блудството, нечистотата, сласта, лошата желба, лакомството, кое е идолопоклонство!

⁶Поради тие пороци доаѓа гневот Божји врз синовите на непослушноста,

⁷меѓу кои некогаш се движевте и вие, кога живеевте во тие пороци.

⁸А сега и вие отфрлете сѐ од себе: гневот, лутината, злобата, хулењето, срамните зборови од својата уста!

⁹Не лажете се еден со друг, зашто веќе го соблековте стариот човек заедно со неговите дела,

¹⁰и се облековте во новиот, кој се обновува во познанието, според образот на својот Создател.

¹¹Тука нема повеќе ни Елини, ни Јудејци, ни обрезани, ни необрезани, ни варварин, ни скит, ни роб, ни слободен, а сѐ и во сѐ е Христос.

¹²И така, како избраници Божји, свети и возљубени, облечете се во милосрдност, доброта, смиреност, кротост и долготрпеливост;

¹³трпете се еден со друг и проштавајте си. Ако некој има поплака на некого, како што Христос ви прости, така и вие направете!

¹⁴А над сето тоа облечете се во љубов, која сѐ сврзува во совршенството,

¹⁵и мир Божји да владее во срцата ваши, за што сте повикани во едно тело, и бидете благодарни!

¹⁶Словото Христово изобилно нека се всели во вас; во секоја мудрост да се учите и да се советувате еден друг со псалми и химни, и со духовни песни, пеејќи Му на Господ со благодарност во срцата ваши!

¹⁷И сѐ што правите со збор или со дело, правете го во името на Господ Исус Христос, благодарејќи Му преку Него на Бога и Отецот!

¹⁸Вие, жените, покорувајте им се на мажите свои, како што прилега во името на Господ!

¹⁹Вие, мажите, сакајте ги жените свои и не огорчувајте ги!

²⁰Деца, на родителите свои бидете им послушни во сѐ, зашто тоа Му е благоугодно на Господ!

²¹Татковци, не дразнете ги децата свои, за да не паѓаат со духот!

²²Вие, слуги, во сѐ бидете им послушни на своите земни господари по тело, слугувајте им не само пред очи како оние што сакаат да се умилкуваат на луѓето, туку во простота на срцето, со страхопочит кон Бога!

²³И сѐ што правите, правете го од душата, како за Господ, а не за луѓе,

²⁴знаејќи дека како награда ќе добиете од Господ наследство, бидејќи на Господ Христос Му служите.

²⁵А кој врши неправда, ќе добие според неправдата своја; и нема да има пристрасност!