Read Свето Писмо: Стандардна Библија 2006 (со девтероканонски книги) Исус Навин 10 Bible Online

Исус Навин 10 - Свето Писмо: Стандардна Библија 2006 (со девтероканонски книги) bible

Исус Навин 10

¹Кога ерусалимскиот цар Адони-Седек слушна дека Исус го презел Гај и го фрлил во проклетство, и дека постапил со Гај и со царот негов така, како што постапил со Ерихон и царот негов, и дека Гаваонците склучиле мир и со Израел и живееја меѓу нив,

²тој многу се уплаши, бидејќи Гаваон беше голем град, како еден од царските градови, и поголем од Гај, и сите жители негови беа храбри луѓе.

³Поради тоа ерусалимскиот цар Адони-Седек испрати пратеници кај хевронскиот цар Хомам, и кај Пирам, царот јармутски, и кај Јафија, царот лахишки, и кај Давир, царот еглонски, да им кажат:

⁴„Дојдете кај мене и помогнете ми да го нападнеме Гаваон, затоа што склучи мир со Исус и со синовите Израелови.“

⁵Тие се собраа и отидоа петмина аморејски цареви: ерусалимскиот цар, хевронскиот цар, јармутскиот цар, лахишкиот цар, еглонскиот цар, тие и целиот нивен народ, и го опседнаа Гаваон и почнаа да војуваат против него.

⁶Гаваонците испратија до Исус во логорот во Гилгал, да кажат: „Не кревај раце од твоите слуги; дојди поскоро кај нас, избави нѐ и помогни ни; зашто против нас се собрани сите аморејски цареви, што живеат во планините.“

⁷Исус тргна од Гилгал, тој и со него сите способни за војна, и сите храбри мажи.

⁸Тогаш Господ му рече на Исус: „Не плаши се од нив, зашто Јас ги предадов во твои раце: никој од нив нема да остане пред тебе.“

⁹И ги нападна Исус ненадејно, откако целата ноќ беше одел од Гилгал.

¹⁰Господ ги доведе во забуна од Израелците, и тие им зададоа тежок удар во Гаваон, ги гонеа по патот кон Веторон и ги напаѓаа сѐ до Азека и до Македа.

¹¹А кога бегаа од Израелците по падините на Веторонската планина, Господ фрлаше врз нив од небото големи камења до самиот град Азека, и тие гинеа: бројот на погинатите од камењата беше поголем, отколку на оние, што синовите Израелови ги убија со меч во борбата.

¹²Тогаш Исус Му рече на Господ пред Израелците во оној ден, во кој Господ Бог ги предаде Аморејците во рацете на Израел: „Запри се, сонце, над Гаваон, и ти, месечино, над долината Ајалон!“

¹³И сонцето застана, и месечината стоеше, додека Бог им се одмаздуваше на нивните непријатели, како што е тоа запишано во Книгата на Праведниот: „Сонцето застана на небото и не брзаше да зајде скоро цел ден.“

¹⁴Ни порано ни подоцна немало таков ден како оној, во кој Господ така послушал човечки глас. Зашто Господ војуваше за Израел.

¹⁵Потоа Исус и целиот Израел со него се вратија во логорот во Гилгал.

¹⁶А оние петмина цареви избегаа и се сокрија во пештерата во Македа.

¹⁷Кога му јавија на Исус и му рекоа: „Ги најдовме петмината цареви, тие се кријат во пештерата во Македа“,

¹⁸Исус рече: „Навалете големи камења пред влезот на пештерата и поставете кај неа луѓе да ги чуваат;

¹⁹а вие не се задржувајте, туку гонете ги непријателите ваши, достигнете ги последните редови од нивната војска и не им дозволувајте да отидат по нивните градови, бидејќи Господ, вашиот Бог, ги предаде во вашите раце.“

²⁰Откако Исус и синовите Израелови им зададоа многу тежок удар, преживеаните од нив избегаа во утврдените градови,

²¹целиот народ се врати мирно во логорот кај Исус во Македа, и никој не отвори уста против синовите Израелови.

²²Тогаш Исус рече: „Отворете го влезот на пештерата и доведете ги кај мене од пештерата петмината цареви!“

²³Така и направија: ги доведоа кај него од пештерата петмината цареви: ерусалимскиот цар, хевронскиот цар, јармутскиот цар, лахишкиот цар и еглонскиот цар.

²⁴Кога ги изведоа овие цареви пред Исус, Исус ги повика сите Израелци и им кажа на воените началници, што беа оделе со него: „Приближете се, стапнете со нозете свои врз вратовите на тие цареви!“

²⁵Исус им рече: „Не плашете се и не се ужасувајте, бидете цврсти и храбри; зашто така ќе постапи Господ со сите ваши непријатели, со кои ќе војувате.“

²⁶Потоа Исус ги уби, и ги обеси на пет дрвја; и висеа на дрвјата до вечерта.

²⁷На зајдисонце Исус заповеда, и ги симнаа од дрвјата, ги фрлија во пештерата, во која се криеја, и на влезот од пештерата натрупаа големи камења, кои се и денес таму.

²⁸Во истиот ден го презедоа Македа и го уништија со сечилото на мечот царот негов, и сѐ живо, што се наоѓаше во него: не оставија никој, а да не биде погоден; и со македскиот цар постапија така, како што постапија со ерихонскиот цар.

²⁹Потоа тргна Исус и сите Израелци со него од Македа за Ливна и војуваше против Ливна.

³⁰И ја предаде Господ и неа во рацете на Израел и ја презедоа неа и царот нејзин, и уништи Исус со меч сѐ живо, што се наоѓаше во неа; не остави во неа некој да не биде погоден, а со царот постапи така, како што постапи со ерихонскиот цар.

³¹Од Ливна тргна Исус и сите Израелци со него за Лакиш, постави логор пред него и почна да војува против него;

³²и го предаде Господ Лакиш во рацете на Израел, и тој го презеде во вториот ден, удри по него со сечилото на мечот и по сѐ живо, што беше во него, и го уништи така, како што ја уништи Ливна.

³³Тогаш на помош на Лакиш му дојде гезерскиот цар Хорам; но Исус удри по него со сечилото на мечот и по неговиот народ така, што не остави од народот некој, да избега.

³⁴И тргна Исус и сите Израелци со него од Лакиш за Еглон, постави логор пред него и почна да војува против него;

³⁵и го презедоа во истиот ден и удрија по него со сечилото на мечот, и со сѐ живо, што се наоѓаше во него во тој ден, постапи така, како што постапи со Лакиш.

³⁶Потоа појде Исус и сите Израелци со него од Еглон за Хеврон, го опседнаа,

³⁷го презеде и удри по него со сечилото на мечот и по царот негов, по сите градови негови и по сѐ живо што се наоѓаше во нив; не остави некој, што не беше убиен; како што постапи со Еглон, така го нападна и него и сѐ живо, што се наоѓаше во него.

³⁸Потоа се врати Исус и целиот Израел со него во Давир и го опседна;

³⁹го презедоа него, царот негов и сите села негови, и го удрија со сечилото на мечот, и истребија сѐ живо, што се наоѓаше во него: никого не остави жив; како што постапи со Хеврон и неговиот цар, со Ливна и нејзиниот цар, така постапи и со Давир и царот негов.

⁴⁰И ја порази Исус целата планинска земја, и јужните предели и рамницата и долините и сите нивни цареви; не остави никого да преживее, и сѐ живо погуби, како што беше заповедал Господ, Бог Израелов.

⁴¹Ја порази Исус сета земја од Кадис-Барнеа до Газа и од Гесем дури до Гаваон;

⁴²и сите тие цареви и земјите нивни Исус ги презеде веднаш, бидејќи Господ, Бог Израелов, му помагаше на Израел.

⁴³Потоа Исус и сите Израелци со него се вратија во логорот во Гилгал.