Read Свето Писмо: Стандардна Библија 2006 (со девтероканонски книги) Исус Навин 8 Bible Online

Исус Навин 8 - Свето Писмо: Стандардна Библија 2006 (со девтероканонски книги) bible

Исус Навин 8

¹И му рече Господ на Исус: „Не плаши се и не се ужасувај; земи ги со себе сите мажи, способни за војна и оди во Гај; ете, Јас ќе го предадам во твои раце гајскиот цар и неговиот народ, неговиот град, и неговата земја.

²Направи му на Гај и на царот негов исто она што му направи на Ерихон и на царот негов; само пленот и добитокот негов поделете си го; постави заседа зад градот.“

³Исус и сите мажи, способни за војна, се подготвија да одат во Гај; и одбра Исус триесет илјади храбри мажи и ги испрати во текот на ноќта,

⁴им даде заповед, велејќи: „Скријте се зад градот; не се оддалечувајте од градот и бидете сите готови;

⁵јас, пак, и сите мажи, што се со мене, ќе се доближиме до градот и штом жителите излезат против нас, како и порано, ние ќе избегаме од нив;

⁶тие ќе јурнат по нас, и така ние ќе ги одвлечеме од градот, зашто тие ќе речат: — бегаат од нас, како и порано; откога ќе избегаме од нив,

⁷вие станете од заседата и одете во градот, и Господ, вашиот Бог, ќе ви го предаде во рацете ваши.

⁸Откога ќе го преземете градот, запалете го градот со оган, постапете според заповедта моја; тоа ви го заповедам јас.“

⁹Така ги испрати Исус, и тие отидоа во заседа и заседнаа меѓу Ветил и Гај, на запад од Гај; таа ноќ преноќева Исус среде народот.

¹⁰Откако стана утрината рано, Исус го прегледа народот и тргна — тој и старешините Израелови, пред народот, за Гај;

¹¹и сите мажи, способни за војна, што беа со него, тргнаа, се приближија и дојдоа до градот од спротива.

¹²И се сместија на север од Гај, а меѓу нив и Гај имаше долина. Потоа Исус зеде околу пет илјади души и ги постави во заседа меѓу Ветил и Гај, на запад од градот.

¹³А народот се смести во логорот, кој беше на север од градот, додека неговата заседа беше на запад од градот. А Исус отиде таа ноќ среде долината.

¹⁴Штом царот на Гај го виде тоа, стана рано и излезе веднаш со жителите на градот против Израел во борба на определеното место пред рамнината; но тој не знаеше дека против него има заседа позади градот.

¹⁵Исус и целиот Израел, небаре, се разбиени од нив, избегаа кон пустината;

¹⁶а тие го повикаа целиот народ, што беше во градот, за да ги гонат, и, гонејќи го Исус, се оддалечија од градот;

¹⁷и не остана во Гај и во Ветил ниту еден човек, кој не беше тргнал по Израел; а градот свој го оставија отворен, гонејќи го Израел.

¹⁸Тогаш Господ му рече на Исус: „Спружи го копјето, што е во раката твоја, кон Гај, бидејќи Јас ќе го предадам во твоите раце и заседата веднаш нека стане од своето место!“ Исус го спружи кон градот копјето, што беше во раката негова.

¹⁹А оние што беа во заседа станаа веднаш од местото свое и јурнаа, штом ја испружи раката своја, влегоа во градот, го презедоа и за миг го запалија со оган.

²⁰Гајските жители, кога погледнаа назад, видоа дека од градот се крева дим кон небото. Немаше каде да бегаат — ниту натаму, ниту наваму; зашто народот, што беше во пустината, се сврте кон гонителите.

²¹Исус и целиот Израел, кога видоа дека оние што беа во заседа го презеле градот и дека од градот се крева дим, се вратија и почнаа да ги убиваат жителите на Гај.

²²А оние од градот излегоа против нив, така што тие се најдоа меѓу Израелците, од кои едни беа на едната страна, а другите на другата; така ги разбија, што не оставија од нив ниту еден жив, ниту избеган;

²³а царот на Гај го фатија жив и го доведоа кај Исус.

²⁴Откако Израелците ги убија сите жители од Гај во полето и во пустината, каде што ги гонеа, и откако тие сите до еден паднаа од сечилото на мечот, тогаш сите Израелци се вратија во Гај и го поразија со сечилото на мечот.

²⁵Бројот на мажите и жените загинати во тој ден изнесуваше дванаесет илјади. Сите беа жители на Гај.

²⁶Исус не ја тргна раката своја, што ја беше испружил со копјето, додека не ги фрли во проклетство сите од Гај;

²⁷само добитокот и пленот од тој град синовите Израелови го поделија меѓу себе, според Господовиот збор, што Господ беше му го кажал на Исус.

²⁸Тогаш Исус го изгоре Гај и го претвори во вечни урнатини, кои стојат до ден-денес.

²⁹А гајскиот цар го обеси на дрво до вечерта; по зајдисонце Исус пак им заповеда, и го симнаа трупот негов од дрвото, го фрлија пред градските порти во ров, и натрупаа врз него голем куп камења, кој постои до ден-денешен.

³⁰Тогаш Исус Му изгради жртвеник на Господ, Бог Израелов, на гората Евал,

³¹како што Мојсеј, слугата Господов, им беше заповедал на синовите Израелови, за кое беше напишано во книгата на Мојсеевиот закон, — жртвеник од цели камења, до кои не допрело железо; и принесоа врз него сепаленици на Господ и жртви за мир.

³²И таму на камењата Исус напиша препис од законот на Мојсеј, што тој го беше напишал за синовите Израелови.

³³Сиот Израел, старешините негови и управителите негови и судиите негови, застанаа од едната и од другата страна на ковчегот спроти свештениците — левитите, кои го носеа ковчегот на заветот Господов, — како природените, така исто и придојдените жители, едната половина од нив кај планината Гаризим, а другата половина кај планината Евал, како што порано Мојсеј, слугата Господов, беше заповедал да се благословува народот Израелов.

³⁴Потоа Исус ги прочита сите зборови од законот, благословувањата и проклетствата, како што е напишано во книгата на законот;

³⁵од сѐ, што Мојсеј му беше заповедал на Исус, немаше ни збор што Исус не го прочита пред целото израелско собрание, пред мажите и жените и децата и придојдените што се најдоа меѓу нив.