Read Свето Писмо: Стандардна Библија 2006 (со девтероканонски книги) 2 Тимотеј 4 Bible Online

2 Тимотеј 4 - Свето Писмо: Стандардна Библија 2006 (со девтероканонски книги) bible

2 Тимотеј 4

¹И така, те заколнувам пред Бога и нашиот Господ Исус Христос, Кој ќе им суди на живите и мртвите, кога ќе дојде Тој и Неговото царство:

²проповедај го словото, настојувај во погодно време и во невреме, укорувај, забранувај, советувај со голема долготрпеливост и поука.

³Зашто ќе дојде време кога луѓето нема да го слушаат здравото учење, но, водени по своите похоти, ќе си изберат учители да им го залажат слухот;

⁴тие ќе го одвратат слухот свој од вистината и ќе се свртат кон бајки.

⁵Но ти во сѐ биди трезвен, претрпи зло, направи дело достојно на благовестител, службата своја исполнувај ја добро!

⁶Зашто јас веќе се изливам како жртва леаница, а времето за моето заминување настапи.

⁷Добро се борев, патот го завршив, верата ја запазив.

⁸Понатаму ме очекува венецот на правдата, што ќе ми го даде во оној ден Господ, праведниот Судија; но не само мене, туку и на сите кои се радуваат на Неговото појавување.

⁹Погрижи се да дојдеш кај мене скоро!

¹⁰Зашто Димас ме остави, бидејќи го засака сегашниот свет, и отиде во Солун; Крискент — во Галатија, Тит — во Далмација. Само Лука е со мене.

¹¹Земи го Марко и доведи го со себе, зашто ми е нужен во службата!

¹²А Тихик го пратив во Ефес.

¹³Кога ќе дојдеш, донеси ја наметката што ја оставив во Троада, кај Карп и книгите, а особено пергаментите.

¹⁴Ковачот Александар ми направи големо зло. Ќе му врати Господ според делата негови!

¹⁵Од него пази се и ти, бидејќи тој необично многу се воспротиви на нашите зборови!

¹⁶При мојата прва одбрана никого немаше кај мене: сите ме оставија. Нека не им се прими за грев!

¹⁷Но Господ беше со мене и ме закрепна, та преку мене да се утврди Благовестието и да чујат сите незнабошци; и јас се избавив од устата на лавот.

¹⁸Господ ќе ме избави од секакво лошо дело и ќе ме запази за Своето небесно царство. Нему слава во вечни векови. Амин!

¹⁹Поздрави ги Прискила и Акила, и Онисифоровиот дом.

²⁰Ераст остана во Коринт. А Трофим го оставив болен во Милит.

²¹Побрзај да дојдеш пред зимата! Те поздравуваат Евул, Пуд, Лин, Клавдија и сите браќа.

²²Господ Исус Христос нека е со твојот дух! Благодат на сите вас! Амин!