Read Свето Писмо: Стандардна Библија 2006 (со девтероканонски книги) Филимон 1 Bible Online

Филимон 1 - Свето Писмо: Стандардна Библија 2006 (со девтероканонски книги) bible

Филимон 1

¹Павле, затвореник на Исус Христос, и братот Тимотеј, до возљубениот Филимон, нашиот сотрудник,

²и до Апфија, возљубената сестра, и до Архип, нашиот соборец, и до твојата домашна црква.

³Благодат вам и мир од Бога, нашиот Отец, и од Господ Исус Христос!

⁴Секогаш Му благодарам на мојот Бог, кога те спомнувам во молитвите свои,

⁵бидејќи слушам за твојата љубов и вера, која ја имаш во Господ Исус и кон сите светии,

⁶и молам нашата заедничка вера да се покаже во тебе на дело во познанието на секое добро, кое го имаме за Исус Христос.

⁷Зашто ние многу се радуваме и утешуваме поради твојата љубов, брате, бидејќи преку тебе се успокоија срцата на светиите.

⁸Затоа, иако имам во Христос голема слобода да ти заповедам што треба да правиш,

⁹сепак, од љубов кон тебе, те молам јас, каков што сум, старецот Павле, а сега и затвореник за Исус Христос,

¹⁰и те молам за моето чедо, Онисим, што го родив во оковите свои:

¹¹и тој некогаш беше непотребен за тебе, а сега ни е многу попотребен и тебе, и мене.

¹²Ти го праќам назад него — прими го како да е моето срце.

¹³Јас сакав да го задржам кај мене, за да ми служи место тебе во оковите што ги носам за Евангелието.

¹⁴Но без твоја согласност не сакав ништо да направам, за да биде твојата добрина не како принуда, туку доброволна.

¹⁵Зашто, можеби тој поради тоа се одвои од тебе за малку време, за да го примиш засекогаш,

¹⁶не веќе како роб, а повеќе од роб, како возљубен брат, а особено за мене, и уште повеќе за тебе — и по тело, и во Господ.

¹⁷И така, ако ме имаш за содругар, прими го како да си ме примил мене.

¹⁸Ако, пак, во нешто ти згрешил, или ти е должен, префрли го тоа на моја сметка.

¹⁹Јас, Павле, напишав со своја рака: јас ќе платам, за да не ти речам дека ти и самиот цел си ми должен.

²⁰Да, брате, да го добијат од тебе во Господ она за што Го молам; развесели го срцето мое во Господ.

²¹Убеден во твојата послушност, ти напишав, знаејќи дека ќе направиш и повеќе отколку што ти велам.

²²А заедно со ова приготви ми и сместување, зашто се надевам дека со вашите молитви ќе ви бидам даруван вам.

²³Те поздравува Епафрас, кој е со мене затвореник во Христос Исус, Марко, Аристарх, Димас, Лука — моите соработници.

²⁴Благодатта на нашиот Господ Исус Христос нека биде со вашиот дух. Амин!