Read Свето Писмо: Стандардна Библија 2006 (со девтероканонски книги) Евреите 12 Bible Online

Евреите 12 - Свето Писмо: Стандардна Библија 2006 (со девтероканонски книги) bible

Евреите 12

¹Затоа и ние, имајќи толку многу сведоци, да отфрлиме од себе секакво бреме и грев, што лесно се прилепува за нас, и со трпеливост да побрзаме кон претстојната борба,

²имајќи Го пред очи Зачетникот и Довршителот на верата — Исус, Кој, поради Неговата идна радост претрпе крст, занемарувајќи го срамот, и седна од десната страна на престолот Божји.

³Мислете на Оној Кој од грешниците претрпе над Себеси таква поруга, та да не ви дотегне, и да не станете малодушни!

⁴Во борбата против гревот уште не сте се противеле до крв.

⁵И сте ја заборавиле утехата која вам, како на синови ви зборува: „Сине мој, не презирај ја казната од Господ и не биди малодушен кога те казнува,

⁶зашто Господ го казнува оној кого што го сака; го кара секој син што го прима.“

⁷Ако трпите казна, Бог со вас постапува како со синови. Зашто кој е тој син кого таткото не го казнува?

⁸Ако, пак, останете без казна, во која сите станаа соучесници, тогаш сте деца незаконски, а не синови.

⁹Ако се плашиме од нашите татковци кога нѐ казнуваат, тогаш колку повеќе треба да Му се покориме на Отецот на духовите, па да бидеме живи?

¹⁰Зашто тие нѐ казнуваат за кратко време, како што им се чинело најдобро; а Тој — за полза, та да учествуваме во Неговата светост.

¹¹Секоја казна во почетокот не се покажува дека е за радост, туку за жалост; но потоа на оние што ќе се поучат од неа таа ќе им принесе мирен род на праведност.

¹²Затоа „исправете ги премалените раце и ослабените колена“,

¹³и со нозете свои „Направете си прави патеки“, та, она што е куцо, да не се повреди, туку поскоро да се исцели.

¹⁴Трудете се да имате мир со сите и светост, без која никој нема да Го види Господа:

¹⁵гледајќи, да не би некој да се лиши од Божјата благодат, да не би некој горчлив корен, штом изникне, да направи штета, и преку него да се осквернат мнозина;

¹⁶да не би меѓу вас да има некој блудник, или нечестив како Исав, кој за една манџа се откажа од своето право на првородство.

¹⁷Зашто знаете дека тој и отпосле, сакајќи да го наследи благословот, беше отфрлен, бидејќи не најде место за покајание, иако го беше молел дури со солзи.

¹⁸Вие не пристапивте кон планината што може да се опипа и кон разгорениот оган, кон облакот, и темнината, и луњата,

¹⁹и кон трубниот звук, и кон гласот што зборуваше, чии слушачи молеа да не им се зборува веќе,

²⁰зашто не можеа да го истрпат она што им се заповедаше: „И ѕвер ако се допре до гората, со камења нека биде убиен.“

²¹И толку страшна беше глетката, што и Мојсеј рече: „Треперам од страв!“

²²Но вие пристапивте кон Сион и градот на живиот Бог, небесниот Ерусалим, и кон безбројните ангели, на свечениот собор,

²³кон собранието на првородените, кои се запишани на небесата, и кон Бога, Судијата на сите, и кон духовите на праведниците, што достигнаа совршенство,

²⁴и кон Исус, Посредникот на Новиот завет, и кон крвта за попрскување, која подобро зборува од Авеловата.

²⁵Гледајте да не Го отфрлите Оној Кој зборува. Зашто, ако не останаа неказнети оние, што откажаа да му служат на оној што зборуваше на земјата, а колку повеќе ние, кои Го отфрламе Оној, Кој зборува од небесата

²⁶Чиј глас тогаш ја потресе земјата, а Кој сега ветува, зборувајќи: „Уште еднаш Јас ќе ја потресам не само земјата, туку и небото.“

²⁷Зборовите „уште еднаш“ означуваат дека колебливото ќе се отстрани, та да остане само непоколебливото.

²⁸И така, примајќи го непоколебливото царство, да искажеме благодарност со која ќе Му служиме на Бога благоугодно со почит и во страв,

²⁹бидејќи нашиот Бог е оган што изгорува.