Read Свето Писмо: Стандардна Библија 2006 (со девтероканонски книги) Јаков 1 Bible Online

Јаков 1 - Свето Писмо: Стандардна Библија 2006 (со девтероканонски книги) bible

Јаков 1

¹Јаков, слуга на Бога и на Господ Исус Христос, испраќа поздрав до дванаесетте племиња, кои живеат раселени.

²Радувајте се, браќа мои, кога ќе паднете во разни искушенија,

³знаејќи дека проверката на вашата вера создава трпеливост:

⁴трпеливоста, пак, нека биде совршено дело за да бидете совршени и целосни, без никаков недостаток.

⁵Ако некому од вас му недостига мудрост, нека ја побара од Бога, Кој на сите им дава изобилно и без приговарање — и ќе му се даде.

⁶Но да моли со вера и никако да не се сомнева; зашто оној кој се сомнева, прилега на морски бран, кого ветрот го издига и растура;

⁷таков човек нека не мисли дека ќе добие нешто од Господ.

⁸Човек што се двоуми во сите свои патишта е непостојан.

⁹Братот, кој е на пониска положба, нека се фали со возвишеноста своја,

¹⁰а богатиот — со својата понизност, бидејќи тоа е минливо како цвет од трева;

¹¹зашто како што сонцето огрева и со својата жега ја исушува тревата, и цветот нејзин отпаѓа, и убавината на нејзиниот изглед исчезнува, така ќе овене и богатиот во својот пат.

¹²Блажен е оној човек кој издржува искушение, бидејќи откако ќе биде проверен, ќе добие венец на животот, што Господ им го ветил на оние кои Го сакаат.

¹³Ниеден, кога е во искушение да не вели: „Бог ме искушува“, бидејќи Бог со зло не се искушува, и Тој никого не искушува,

¹⁴но секого го искушува неговата похота која го влече и мами.

¹⁵Потоа похотта, откако ќе се зачне, раѓа грев, а гревот, извршен, раѓа смрт.

¹⁶Не мамете се, браќа мои возљубени.

¹⁷Секој добар дар и секој совршен подарок иде озгора, симнувајќи се од Отецот на светлината, во Кого нема промени ни сенка од измена.

¹⁸Зашто Тој нѐ роди по својата волја преку словото на вистината, за да бидеме првина меѓу Неговите созданија.

¹⁹И така, мои возљубени браќа, секој човек нека биде брз за слушање, а спор за зборување, и бавен за гнев,

²⁰бидејќи човечкиот гнев не ја извршува Божјата правда.

²¹Затоа, отфрлувајќи од себеси секаква нечистота и насобрана злоба, со кроткост примете го насаденото слово, кое може да ги спаси вашите души.

²²Бидете извршители на словото, а не само слушатели, мамејќи се сами себе.

²³Зашто, кој го слуша словото, а не го извршува, тој прилега на човек кој го гледа своето сопствено лице во огледало;

²⁴ќе се погледне, па ќе си замине, и веднаш заборава каков бил.

²⁵Но кој ќе се задлабочи во совршениот Закон на слободата и остане во него, тој, бидејќи не е заборавлив слушател, туку извршител кој дејствува, ќе биде блажен во своето дејствување.

²⁶Ако некој од вас мисли дека е побожен, а не го зауздува јазикот свој, туку го мами срцето свое, неговата побожност е суетна.

²⁷Чиста и непорочна вера пред Бога Отецот е оваа: да се грижиш за сираци и вдовици во нивните маки и да се пазиш да останеш неосквернет од светот.