Read Свето Писмо: Стандардна Библија 2006 (со девтероканонски книги) 2 Петар 2 Bible Online

2 Петар 2 - Свето Писмо: Стандардна Библија 2006 (со девтероканонски книги) bible

2 Петар 2

¹А во народот имаше и лажни пророци, како што и меѓу вас ќе има лажни учители, кои ќе внесат погубни ереси и, откако се одречат од Господ, Кој ги откупил, ќе навлечат врз себеси брза погибел.

²И мнозина ќе појдат по нивните нечистотии, и поради нив патот на вистината ќе биде похулен.

³И, побудувајќи ве од користољубивост, ќе ве привлекуваат со ласкави зборови; но нивното осудување е одамна готово, и нивната погибел не дреме.

⁴Зашто Бог, кога не ги поштеди ангелите што згрешија, туку ги фрли во пеколот со вериги на мракот, ги предаде да бидат држани до судот;

⁵и кога не го поштеди првиот свет, туку, кога нанесе потоп врз безбожниот свет, го запази само осумчленото семејство на Ное, проповедникот на правдата;

⁶и градовите Содом и Гомора ги осуди на разурнување и ги претвори во пепел, оставајќи ги како пример на идните безбожници,

⁷а го избави праведниот Лот, кого го осрамотија беззакониците со нечистиот живот.

⁸Зашто, кога живееше праведникот меѓу нив, гледајќи ги и слушајќи ги беззаконските дела, тој секојдневно ја измачуваше својата праведна душа;

⁹значи Господ знае како да ги избавува побожните од искушенија, а неправедните да ги држи во маки за судниот ден;

¹⁰а најмногу оние што се управуваат според телото во неговите гнасни похоти, кои ја презираат власта, дрски се, горди и не се плашат да хулат на власта,

¹¹но дури ни ангелите, кои се поснажни и посилни од нив, не изговараат за нив хула пред Господ.

¹²А тие, како неразумни животни, созданија по инстинкт се фаќаат и се уништуваат, хулејќи го она што не го разбираат, во својата погибел ќе загинат,

¹³добивајќи казна за вршење неправда. Тие секојдневниот живот во раскош го сметаат за уживање; тие се срам и грев, насладувајќи се со своите измами, додека јадат со вас;

¹⁴имаат очи полни со прељубодејство и ненаситни се на грев, ги мамат неутврдените души; имаат срце привикнато на лакомство: тие се чеда на проклетството!

¹⁵Откако го оставија вистинскиот пат и се заблудија, тргнаа по стапките на Восоровиот син Валаам, кој засака плата за вршење неправда,

¹⁶но беше изобличен за своето беззаконие: неразумното животно проговори со човечки глас и го запре безумството на пророкот.

¹⁷Тие се безводни извори, облаци и магли од бура разнесувани; за нив е резервиран мракот на темнината засекогаш.

¹⁸Зашто, говорејќи празни зборови, ги мамат на телесни похоти и нечистотија оние кои тукушто се оттргнале од тие што живеат во заблуда.

¹⁹Им ветуваат слобода кога тие самите се робови на развратот, зашто кога некој некого победува, тој и го поробува.

²⁰Зашто, ако ги избегнале световните скверности преку познанието на Господ и Спасителот наш Исус Христос, и пак се плеткаат во нив и бидуваат победени, тогаш за такви последното ќе им биде полошо од првото!

²¹За нив би било подобро да не го беа познале патот на правдата отколку, откако го познаа, да отстапат од светата заповед која им е предадена.

²²Ним им се случува според вистинската поговорка: „Песот се враќа на својата блујавица“ и „Искапената свиња — во калта.“