Read Свето Писмо: Стандардна Библија 2006 (со девтероканонски книги) Судии 2 Bible Online

Судии 2 - Свето Писмо: Стандардна Библија 2006 (со девтероканонски книги) bible

Судии 2

¹Дојде ангел Господов од Гилгал во Бохим и рече: „Јас ве изведов од Египет и ве воведов во земјата, за која им се заколнав на татковците ваши; и реков: — нема да го нарушам Мојот завет со вас никогаш;

²вие, пак, не влегувајте во сојуз со жителите на оваа земја; на боговите нивни не им се поклонувајте, идолите нивни скршете ги, жртвениците нивни урнете ги. Но вие не го послушавте гласот Мој. Зошто постапивте така?

³Затоа велам: нема да ги истерам од вас, и тие ќе бидат трње за вас, а боговите нивни ќе ви бидат соблазна.“

⁴Кога ангелот Господов ги кажа тие зборови пред сите синови Израелови, народот крена голем пискот и заплака.

⁵Поради тоа и го нарекуваат тоа место Бохим. Таму тие Му принесоа жртва на Господ.

⁶Откако Исус го распушти народот, синовите Израелови заминаа секој во својот дел за да добие во наследство земја.

⁷Народот Му служеше на Господ во текот на сите денови на Исус и во текот на сите денови на старешините, кои го надживеаја Исус, и кои го беа виделе сето големо дело на Господ што Тој го направи за Израел.

⁸А кога умре Исус, синот Навинов, слуга Господов, на сто и десет години,

⁹го погребаа во пределите на неговиот дел што го наследи во Тимнат-Херес, во Ефремовата Гора, на север од планината Гааш;

¹⁰и кога целото поколение им се придружи на своите предци, и настана по нив друг род, кој не Го знаеше Господа и делата Негови, какви што му беше направил на Израел, —

¹¹тогаш Израеловите синови почнаа да прават зло пред Господ и да му служат на Ваал;

¹²Го оставија Господа, Бог на татковците нивни, Кој ги беше извел од земјата египетска, и се свртеа кон други богови, кон боговите на тамошните места, и почнаа да им се поклонуваат, и Го разгневија Господа;

¹³Го оставија Господа и почнаа да им служат на Вааловци и на разни Астарти.

¹⁴Тогаш Господ силно се разгневи против Израелците и ги предаде во рацете на грабачи, кои ги ограбуваа; и ги предаде во рацете на околните народи, и не можеа повеќе да одолеат пред непријателите свои.

¹⁵Насекаде, каде и да отидеа тие, раката Господова беше против нив на зло, како што им беше говорел Господ и како што им се беше заколнал Господ. И тие беа на голема мака.

¹⁶Тогаш Господ постави судии, кои ги спасуваа од рацете на оние што ги пленеа.

¹⁷Но тие и нив не ги слушаа, туку блудствуваа со други богови и ним им се поклонуваа, а потоа скршнаа од патот, по кој одеа нивните предци, кои им се покоруваа на заповедите од Господ. Тие не правеа така.

¹⁸Но кога Господ им поставуваше судии, Сам Господ беше со судијата и ги спасуваше од непријателите нивни во текот на целиот век на судијата, зашто Господ ги сожалуваше, слушајќи ги офкањата нивни од оние што ги угнетуваа и потискаа.

¹⁹Но штом ќе умреше судијата, тие одново почнуваа да живеат во уште поголем разврат од своите предци, одејќи по други богови, да им служат и да им се поклонуваат. И не отстапуваа од делата свои жестоки и од лошиот пат свој.

²⁰Тогаш Господ силно се разгневи против Израел и рече: „Поради тоа што овој народ отстапи од заветот Мој што го поставив со нивните предци, и не го послушаа гласот Мој,

²¹ни Јас нема повеќе да протерувам пред нив ниеден од народите што ги остави Исус, кога умираше,

²²за да го испитам Израел; ќе почнат ли да се држат до патот Господов и да одат по него, како што се држеа татковците нивни, или не?“

²³И Господ ги остави тие народи и не ги протера веднаш и не ги предаде во рацете на Исус.