Read Свето Писмо: Стандардна Библија 2006 (со девтероканонски книги) Судии 5 Bible Online

Судии 5 - Свето Писмо: Стандардна Библија 2006 (со девтероканонски книги) bible

Судии 5

¹Во тој ден запеаја Девора и Варак, синот Авиноамов со овие зборови:

²„Благословувајте Го Господа зашто се одмазди за Израел, народот покажа сесрдност.

³Слушајте, цареви, внимавајте, кнезови; јас ќе Му пеам и ќе Му свирам на Господ, на Господ, Бог Израелов!

⁴Кога излегуваше Ти, Господи, од Сеир, кога доаѓаше од полето Едом, земјата се тресеше, небото капеше и облаците вода пролеваа;

⁵горите се топеа од лицето на Господ, дури и Синај затрепери пред Господ, Бог Израелов.

⁶Во дните на Самегар, синот Анатов, во дните на Јаел, патиштата опустеа и кои порано одеа по правите патишта, тогаш одеа по околните патеки.

⁷Во Израел немаше жител во селата, немаше, додека јас, Девора, не станав, додека не востанав јас, мајката Израелова.

⁸Избраа нови богови, затоа војната беше пред вратата. Се виде ли штит и копје меѓу четириесет илјади од Израел?

⁹Срцето ми е кон вас, началници Израелови, кон ревнителите во народот; прославувајте Го Господа!

¹⁰Вие, кои јавате на бели магариња што седите во судовите и одите по патот, разгласувајте!

¹¹Среде гласовите на оние што плескаат, таму нека покажат правда, Господи, зацврсти ја правдата во Израел! Тогаш народот Господов се разотиде по своите градови.

¹²Разбуди се, разбуди се, Девора, разбуди се, па запеј песна! Стани, Варак и води ги своите платеници, сине Авиноамов!

¹³Тогаш се возвеличи силата негова; Господ мене ми ги потчини храбрите.

¹⁴Од Ефрем дојдоа оние, кои беа фатиле корен во долините; по тебе е братот твој Венијамин, според народот твој; од Махир доаѓаа началници, а од Завулон оние што се занимаваат со пишување.

¹⁵И кнезовите Исахарови се со Девора, и Исахар исто така како Варак, се спуштија пеш во долината. Во Рувимовите племиња — големо разногласие.

¹⁶Зошто си ми седнал меѓу кошарите и го слушаш блеењето на стадата? Во Рувимовите племиња — големо несогласие.

¹⁷Галаад си живее спокојно од онаа страна на Јордан, и зошто Дан да се занимава со корабите, а Асир да седи на морскиот брег и се весели крај своите пристаништа.

¹⁸Завулон е народ, кој ја даде душата своја на смртта, и Нефталим — на полските височини.

¹⁹Дојдоа цареви, тогаш се судрија царевите ханански во Таанах, крај водите Мегидонски, но ни парче сребро не добија.

²⁰Од небото се војуваше, се биеја ѕвездите од своите патишта против Сисера.

²¹Потокот Кишон ги одвлече; стародревниот поток — потокот Кишон. Гази ги, душо моја, силните!

²²Тогаш отпаѓаа копитата на коњите од топотење, од терање на јавачите нивни.

²³Проколнете го Мероз, рече ангелот Господов, проколнете ги жителите негови, затоа што не дојдоа на помош на Господ со храбрите.

²⁴Нека е благословена меѓу жените Јаел, жената на Кениецот Хевер, меѓу жените во шаторите нека е благословена!

²⁵Тој побара вода: таа млеко му даде, во војводска чаша му донесе мрсно млеко.

²⁶Левата рака своја таа ја протегна кон колецот, а десната — кон чеканот ковачки; го удри Сисера, му ја здроби главата, го прободе и му ги проби слепоочниците негови.

²⁷Меѓу нозете нејзини падна, истоштен се испружи и умре, меѓу нозете нејзини падна веднаш.

²⁸Погледна низ прозорецот Сисеровата мајка, низ решетката и си помисли: зошто не доаѓа уште колата негова, зошто се забавуваат тркалата на колите негови?

²⁹Мудрите нејзини дворјани ѝ одговараат, а и самата таа си одговара на зборовите свои:

³⁰можеби нашле плен, па го делат: кому по една мома, кому по две на војник. Плен шарен за Сисера, плен шарен, везен; шарен и везен од обете страни, симнат од рамениците на пленикот.

³¹Така да загинат сите Твои непријатели, Господи! А оние, кои Го сакаат, да бидат како сонце кога изгрева во сета своја сила!“ — И мирна беше земјата четириесет години.