Read Свето Писмо: Стандардна Библија 2006 (со девтероканонски книги) Откровение 1 Bible Online

Откровение 1 - Свето Писмо: Стандардна Библија 2006 (со девтероканонски книги) bible

Откровение 1

¹Откровение на Исус Христос, кое Му го даде Бог, за да им го покаже на слугите Свои она што треба да стане скоро. Тој го најави тоа испраќајќи го Својот ангел на слугата Свој Јован,

²Кој го посведочи словото Божјо и сведоштвото на Исус Христос, и сѐ што виде.

³Блажен е оној кој чита и оние кои ги слушаат зборовите на ова пророштво и пазат на напишаното во него; зашто времето е блиску.

⁴Јован — до седумте цркви, што се во Азија: благодат вам и мир од Оној, Кој е, и Кој бил, и Кој иде, и од седумте духови кои се пред Неговиот престол,

⁵и од Исус Христос, Кој е верен сведок. Првороден од мртвите и Господар на земните цареви. Нему, Кој нѐ возљуби и изми од нашите гревови преку Својата крв

⁶и Кој нѐ направи пред Бога и Неговиот Отец царство на свештеници, слава и власт во вечни векови. Амин!

⁷Ете, иде со облаци, и ќе го види секое око, и оние што Го прободоа; и ќе се расплачат пред Него сите племиња на земјата. Да. Амин!

⁸Јас сум Алфа и Омега, почеток и крај — вели Господ, Кој е, Кој беше, и Кој иде, Седржителот.

⁹Јас, Јован, вашиот брат и соучесник во скрбта и во царството и во трпението на Исус, бев на островот, наречен Патмос, заради словото Божјо и заради сведоштвото на Исус.

¹⁰Во Господовиот ден бев понесен од Духот и зад себе чув силен глас како од труба [1],

¹¹кој велеше: „Тоа што ќе го видиш, напиши го во книга и испрати го до седумте Цркви, (што се во Азија): во Ефес и во Смирна, во Пергам и во Тиатир, во Сард, во Филаделфија и во Лаодикија!“

¹²И се свртев за да го видам гласот што зборуваше со мене; и штом се свртев, видов седум златни свеќници,

¹³а сред седумте свеќници еден, како Синот Човечки, облечен во долга облека до нозете и околу градите препашан со златен појас;

¹⁴главата и косата Му беа бели како бела волна, како снег, а очите Негови — како огнен пламен;

¹⁵нозете Негови — слични на усвитена бронза, како во печка вжарена, а гласот Негов — како шум од многу води.

¹⁶Во Својата десна рака Тој држеше седум ѕвезди, а од Неговата уста излегуваше меч со две острици; лицето Негово светеше како што сонцето сјае во полна сила.

¹⁷Штом Го видов, паднав пред Неговите нозе како мртов. Тој ја стави Својата десна рака врз мене и ми рече: „Не плаши се! Јас сум Првиот и Последниот

¹⁸и Живиот. Бев мртов, и ете, жив сум за сите векови и ги имам клучевите од адот и смртта.

¹⁹И така напиши што виде, што е и што има да стане по тоа.

²⁰Ова е тајната на седумте ѕвезди што ги виде во Мојата десница, а на седумте златни свеќници: седумте ѕвезди се ангелите на седумте цркви — а седумте свеќници, што ги виде, тоа се седумте цркви.“