Read Свето Писмо: Стандардна Библија 2006 (со девтероканонски книги) Откровение 2 Bible Online

Откровение 2 - Свето Писмо: Стандардна Библија 2006 (со девтероканонски книги) bible

Откровение 2

¹На ангелот на Ефеската црква напиши му: ова го вели Оној Кој ги држи седумте ѕвезди во десницата Своја, Кој оди среде седумте свеќници;

²ги знам делата твои, трудот твој и трпението твое, и дека не можеш да ги поднесеш лошите; знам дека си ги испитал оние што себеси се нарекуваат апостоли, а не се, и дека си утврдил дека се лажговци;

³дека имаш трпение, дека си поднесувал за името Мое и дека не си се уморил.

⁴Но имам нешто против тебе, зашто ја остави својата прва љубов.

⁵Спомни си од каде си паднал и покај се, и врши ги поранешните дела; ако не, скоро ќе ти дојдам и ќе го преместам свеќникот твој од местото негово, ако не се покаеш.

⁶А ова го имаш: ги мразиш делата на николаитите, кои и Јас ги мразам.

⁷Кој има уво, нека чуе што им зборува Духот на Црквите: — на оној што победува ќе му дадам да јаде од дрвото на животот што е сред Божјиот рај.

⁸И на ангелот на Смирненската црква напиши му: така вели Првиот и Последниот, Кој беше мртов и еве оживеа:

⁹ги знам твоите дела, скрбта и сиромаштијата — но ти си богат: и хулењата на оние, кои за себе велат дека се Јудејци, а не се, туку се сатанска збирштина.

¹⁰Не плаши се воопшто од она што ќе треба да го истрпиш. Ете, ѓаволот некои од вас ќе фрли в затвор за да ве искуша, и ќе бидете нажалени десетина дни. Биди верен до самата смрт и ќе ти го дадам венецот на животот.

¹¹Кој има уво, нека чуе што им зборува Духот на црквите: на победникот, втората смрт нема да му нанесе штета.

¹²А на ангелот на Пергамската црква напиши му: вака вели Оној Кој држи меч со две острици:

¹³(ги) знам (делата твои) каде живееш, каде е престолот на сатаната, и дека го држиш името Мое, и дека не се одрече од верата Моја дури и во деновите кога Мојот верен сведок Антипа беше убиен меѓу вас, во чија средина живее сатаната.

¹⁴Но за неколку работи сум против тебе, зашто имаш таму некои што го држат учењето на Валаам, кој го учеше Валака да ги наведе на грев синовите Израелови, та да јадат жртви идолски и да блудствуваат.

¹⁵А имаш и некои што го држат учењето на николаитите, кое го мразам.

¹⁶Покај се! Ако, пак, не, скоро ќе ти дојдам и ќе стапам во борба против нив со мечот на устата Своја.

¹⁷Кој има уво, нека чуе што им зборува Духот на црквите: на оној што победува ќе му дадам да јаде од сокриената мана и ќе му дадам бело камче и на камчето напишано ново име, што никој не го знае, освен оној, што го добива!

¹⁸И на ангелот на Тиатирската црква напиши му: ова го вели Синот Божји, Чии очи се како огнен пламен, а нозете слични на усвитена бронза:

¹⁹ги знам твоите дела, и љубовта, и службата, и верата, и служењето, и трпението твое, и дека твоите последни дела се побројни од првите.

²⁰Но за ова сум лут на тебе, зашто позволуваш жената Језавела, која себе се нарекува пророчица, да ги учи и мами слугите Мои да блудствуваат и да јадат идолски жртви.

²¹А ѝ дадов време да се покае за блудството свое, но таа не се покаја.

²²Ете, неа ја фрлам на постела, и оние што блудствуваа со неа, во маки големи — ако не се покаат за делата свои.

²³И чедата нејзини ќе ги казнам со смрт, и сите цркви ќе дознаат дека Јас сум Оној Кој ги истражува срцата и бубрезите; и секому од вас ќе му дадам според делата негови.

²⁴А вам и на другите во Тиатир, што не го држат тоа учење и не ги запознаа таканаречените „длабочини сатански“, ви велам: нема да ви наложам друго бреме.

²⁵Но држете го само она што го имате, додека не дојдам.

²⁶И кој победува и ги пази делата Мои до крај, нему ќе му дадам власт над незнабошците,

²⁷и ќе ги пасе со железен жезол; и тие ќе се строшат како земјени садови.

²⁸Како што и Јас примив власт од Својот Отец, нему ќе му ја дадам ѕвездата Деница.

²⁹Па, кој има уво, нека чуе што им зборува Духот на црквите.