Read Свето Писмо: Стандардна Библија 2006 (со девтероканонски книги) Откровение 21 Bible Online

Откровение 21 - Свето Писмо: Стандардна Библија 2006 (со девтероканонски книги) bible

Откровение 21

¹И видов ново небо и нова земја, зашто поранешната земја помина, и морето го немаше веќе.

²Тогаш јас, Јован, го видов светиот град Ерусалим, нов, како слегува од Бога, од небото, стокмен како невеста променета за својот маж.

³И чув висок глас од небото како зборува: „Ете го светиот шатор, светилиштето на Бога меѓу луѓето, и Тој ќе живее со нив; тие ќе бидат Негов народ, а Сам Бог ќе биде со нив — нивниот Бог.

⁴И ќе ја избрише Бог секоја солза од очите нивни, и смрт нема да има веќе; ни плач, ни пискот, ниту болка нема да има веќе, бидејќи поранешното помина.“

⁵И Седнатиот на престолот рече: „Ете, сѐ ново создавам.“ И ми рече: „Напиши, зашто овие зборови се вистинити и верни.“

⁶Потоа ми рече: „Се сврши! Јас (сум) Алфа и Омега, почетокот и крајот. На жедниот ќе му дадам Јас од изворот на жива вода дарум.

⁷Кој победува, ќе наследи сѐ, и ќе му бидам Бог, а тој ќе Ми биде син.

⁸А на плашливците и неверниците, на поганите и убијците, на блудниците и маѓесниците, на идолопоклониците и на сите што лажат, делот им е во езерото што гори со оган и сулфур, тоа е втората смрт.“

⁹Тогаш дојде кај мене еден од седумте ангели, што ги држеа седумте чаши, полни со седумте последни казни, ми прозборе и рече: „Дојди, ќе ти ја покажам невестата — жената на Јагнето.“

¹⁰Па ме одведе преку Духот во една голема и висока гора и ми го покажа големиот град, светиот Ерусалим, кој слегуваше од небото — од Бога,

¹¹и имаше Божја слава; светлината негова прилегаше на најскапоцен камен, како светол камен јаспис;

¹²тој имаше големи и високи ѕидови, дванаесет порти, а над нив дванаесет ангели и напишани имињата на дванаесетте колена на синовите Израелови:

¹³спроти исток — три порти, спроти север — три порти, спроти југ — три порти, спроти запад — три порти.

¹⁴Ѕидовите на градот имаа дванаесет темели, и врз нив имињата на дванаесетте апостоли на Јагнето.

¹⁵Оној што зборуваше со мене имаше златна трска за да го измери градот и портите негови и ѕидовите негови.

¹⁶Градот беше четириаголен, а должината му е колку што и широчината. Тој го измери градот со трската и најде дека изнесува дванаесет илјади стадии [5]; должината, широчината и височината негова — еднакви.

¹⁷Потоа ги измери ѕидовите негови, што беа сто четириесет и четири лакти, со мерка човечка која е и ангелска.

¹⁸Ѕидовите му беа изградени од јаспис; а градот — од чисто злато, како чисто стакло.

¹⁹Темелите на градските ѕидови беа украсени со секаков вид скапоцени камења: првиот темел — јаспис, вториот — сафир, третиот — халкидон, четвртиот — смарагд,

²⁰петтиот — сардоникс, шестиот — сард, седмиот — хрисолит, осмиот — вирил, деветтиот — топаз, десеттиот — хрисопрас, единаесеттиот — хијацинт, дванаесеттиот — аметист.

²¹А дванаесетте порти беа дванаесет бисери: секоја порта беше од еден бисер; улиците на градот беа од чисто злато како проѕирно стакло.

²²Храм, пак, не видов во него, бидејќи Господ Бог Седржителот и Јагнето се неговиот храм.

²³И градот немаше потреба ни од сонце, ни од месечина за да светат во него, зашто Божјата слава го осветлува, а светило му е Јагнето.

²⁴И спасените народи ќе одат по неговата светлина, и царевите земни ќе ја принесат во него својата слава и чест.

²⁵А портите негови нема да се заклучуваат дење, бидејќи таму нема да има ноќ.

²⁶И ќе ја внесат во него славата и честа на народите;

²⁷и нема во него да влезе ништо нечисто, ни оној кој врши гнасни работи и лаже, а само оние кои се запишани во книгата на животот на Јагнето.