Read Свето Писмо: Стандардна Библија 2006 (со девтероканонски книги) Откровение 7 Bible Online

Откровение 7 - Свето Писмо: Стандардна Библија 2006 (со девтероканонски книги) bible

Откровение 7

¹Потоа видов четири ангела како стојат на четирите агли од земјата, држејќи ги четирите земни ветрови, за да не дува ветар ни на земјата, ни по морето, ниту на некое дрво.

²И видов друг ангел како се подигаше од исток кој имаше печат на живиот Бог. И тој извика со висок глас кон четирите ангели, на кои им беше дадено да ѝ пакостат на земјата и морето, велејќи:

³„Не пакостете ѝ на земјата, ниту на морето, ниту, пак, на дрвјата, додека не им ставиме печат врз челата на слугите на нашиот Бог!“

⁴И го чув бројот на одбележаните со печат: сто четириесет и четири илјади беа одбележани од сите колена на синовите Израелови.

⁵Од Јудиното колено со печат одбележани — дванаесет илјади; од Рувимовото колено — дванаесет илјади; од Гадовото колено — дванаесет илјади;

⁶од Асировото колено — дванаесет илјади; од Нефталимовото колено — дванаесет илјади; од Манасиевото колено — дванаесет илјади;

⁷од Симеоновото колено — дванаесет илјади, од Левиевото колено — дванаесет илјади; од Исахаровото колено — дванаесет илјади;

⁸од Завулоновото колено — дванаесет илјади; од Јосифовото колено — дванаесет илјади; од Венијаминовото колено — дванаесет илјади.

⁹Потоа видов, и ете, големо мноштво народ, кое никој не можеше да го преброи, — од сите племиња и колена, народи и јазици; тие стоеја пред престолот и пред Јагнето, облечени во бели облеки и со палмови гранчиња во рацете.

¹⁰И воскликнуваа со висок глас, велејќи: „За спасението наше слава на нашиот Бог, Кој седи на престолот, и на Јагнето!“

¹¹А сите ангели стоеја околу престолот, старешините и четирите животни, и паднаа ничкум пред престолот и Му се поклонија на Бога,

¹²велејќи: „Амин! Благослов и слава, мудрост и благодарност, чест и сила и моќ на нашиот Бог во сите векови. Амин!“

¹³А еден од старешините прозборе и ме праша: „Оние, облечени во бели облеки, кои се и од каде дошле?“

¹⁴А јас му одговорив: „Ти знаеш, господине.“ А тој ми рече: „Тие се што дојдоа од големи маки; тие ги испраа облеките свои и ги избелија со крвта на Јагнето.

¹⁵Затоа се пред престолот на Бога, Кому Му служат во Неговиот храм и дење и ноќе; и Оној, Кој седи на престолот, ќе се всели во нив;

¹⁶и нема веќе да огладнат, ниту, пак, да ожеднат; нив нема да ги пече сонцето и никаква горештина;

¹⁷бидејќи Јагнето, Кое е среде престолот, ќе ги пасе и води на живи извори водни, и Бог ќе им ја избрише секоја солза од очите нивни.“