Read Свето Писмо: Стандардна Библија 2006 (со девтероканонски книги) Откровение 8 Bible Online

Откровение 8 - Свето Писмо: Стандардна Библија 2006 (со девтероканонски книги) bible

Откровение 8

¹Кога го отвори седмиот печат, настана тишина на небото околу половина час.

²И ги видов седумте ангели што стоеја пред Бога и им беа дадени седум труби.

³Тогаш дојде друг ангел со златна кадилница и застана пред жртвеникот; и му беше даден многу темјан, та со молитвите на сите светии да го постави на златниот жртвеник што беше пред престолот.

⁴Димот од темјанот, заедно со молитвите на светиите се издигна од раката на ангелот пред Бога.

⁵И ја зеде ангелот кадилницата, и ја наполни со оган од жртвеникот, и ја фрли на земјата, и тогаш се појавија гласови, грмотевици, светкавици и земјотрес.

⁶И седумте ангели што ги држеа седумте труби, се приготвија да затрубат.

⁷Првиот ангел затруби, и се појави град и оган, смешани со крв, и паднаа на земјата. И една третина од дрвјата изгореа, и сета зелена трева изгоре.

⁸Затруби и вториот ангел — и како некоја голема гора, пламната во оган, се срина во морето; и третина од морето се претвори во крв;

⁹и умре една третина од морските суштества, што имаа душа; и една третина од корабите пропаднаа.

¹⁰И третиот ангел затруби, и од небото падна голема ѕвезда, која гореше како светило, и падна врз третината од реките и водните извори.

¹¹А името на таа ѕвезда е Пелин. И третиот дел од водите загорчи како пелин, и многу луѓе умреа од водите, бидејќи беа загорчени.

¹²Потоа затруби и четвртиот ангел, и беше удрена една третина од сонцето, една третина од месечината и една третина од ѕвездите, за да потемнее една третина од нив, та третина од денот, како и на ноќта, да не свети.

¹³И видов и чув еден орел како лета среде небото и вика со висок глас: „Тешко, тешко, тешко на оние што живеат по земјата од другите трубни гласови на трите ангели што ќе трубат!“