Read Свето Писмо: Стандардна Библија 2006 (со девтероканонски книги) 1 Самоилова 11 Bible Online

1 Самоилова 11 - Свето Писмо: Стандардна Библија 2006 (со девтероканонски книги) bible

1 Самоилова 11

¹И дојде Амонецот Нахас и го опколи Јавеш Галаадски. И сите жители на Јавеш му рекоа на Нахас: „Склучи со нас сојуз, и ние ќе ти служиме!“

²Но Амонецот Нахас им рече: „Ќе склучам сојуз со вас, но под услов, на секого од вас да му го извадам десното око и со тоа да нанесам срам врз целиот Израел.“

³Старешините на Јавеш му рекоа: „Дај ни рок од седум дена да испратиме пратеници по сите израелски области, и, ако никој не ни помогне, ќе ти се предадеме.“

⁴И пратениците дојдоа во Гива Саулова и му ги раскажаа на народот гласно тие зборови; и сиот народ извика и заплака.

⁵А ете, Саул доаѓаше од нива по воловите свои и рече: „Што станало со народот, та плаче?“ И му ги кажаа зборовите на жителите на Јавеш.

⁶И слезе Духот Божји врз Саул, откако ги чу тие зборови, и силно се разгневи;

⁷па зеде два вола, ги исече на парчиња и ги испрати по сите израелски предели преку тие пратеници, објавувајќи дека така ќе биде постапено со воловите на секого што нема да тргне по Саул и по Самоил. И страв Господов падна врз народот, и тргнаа сите како еден човек.

⁸Саул ги преброи во Безек, и се најдоа синовите Израелови триста илјади и мажи Јудини — триесет илјади.

⁹И им рече на дојдените пратеници: „Вака кажете им на жителите на Јавеш Галаадски: утре ќе имате помош штом ќе припече сонцето.“ И пратениците отидоа и им јавија на јавешките жители, и тие се зарадуваа.

¹⁰И жителите на Јавеш му рекоа на Нахас: „Утре ќе ви се предадеме, и правете со нас што сакате.“

¹¹Следниот ден Саул го раздели народот во три групи, и тие се провлекоа среде логорот по утринската стража и до дневниот припек ги поразија Амонците; другите Амонци се распрснаа така што од нив не останаа ни двајца заедно.

¹²Тогаш народот му рече на Самоил: „Кои беа тие што рекоа — ‚Та Саул ли ќе царува над нас?‘ — Дајте ги тие луѓе, и ние ќе ги убиеме.“

¹³Но Саул рече: „Денес не треба никој да се убие, зашто денес Господ изврши спасение во Израел.“

¹⁴И Самоил му рече на народот: „Да одиме во Гилгал и таму одново да го осветиме царувањето.“

¹⁵И сиот народ отиде во Гилгал и го поставија таму Саул за цар пред Господ, во Гилгал, и принесоа таму жртви за благодарност пред Господ. И се провеселија таму многу, Саул и сите Израелци.