Read Свето Писмо: Стандардна Библија 2006 (со девтероканонски книги) Битие 11 Bible Online

Битие 11 - Свето Писмо: Стандардна Библија 2006 (со девтероканонски книги) bible

Битие 11

¹По целата земја имаше еден јазик и исти зборови.

²А кога луѓето се селеле од исток, најдоа рамнина во земјата Сенаар и се населија таму.

³И си рекоа меѓу себе: „Ајде да правиме тули и на оган да ги печеме!“ И користеа тули наместо камен и земјана смола наместо вар.

⁴Потоа рекоа: „Ајде да си соѕидаме град и кула, висока до небото; и да се здобиеме со име, пред да се растуриме по целата земја!“

⁵Тогаш Господ се спушти да го види градот и кулата, што ги ѕидаа синовите човечки.

⁶И рече Господ: „Ете, еден народ се и сите имаат еден јазик; ова е само почеток на нивните настојувања. Наскоро ќе прават сѐ што ќе наумат!

⁷Ајде да слеземе и да им го збркаме нивниот јазик за да не се разбираат еден со друг што зборуваат!“

⁸И така Господ ги растури оттаму по целата земја, и престанаа да го ѕидаат градот (и кулата).

⁹Затоа тој се нарече Вавилон, зашто таму го збрка Господ јазикот на целата земја и оттаму ги растури Господ по целата земја.

¹⁰Ова е родословието на Сим: Сим имаше сто години кога го роди Арфаксад, две години по потопот.

¹¹И откако го роди Арфаксад, поживеа Сим петстотини години, раѓајќи синови и ќерки.

¹²А Арфаксад поживеа сто триесет и шест години и го роди Каинан.

¹³По раѓањето на Сала, Арфаксад живееше уште триста и триесет години, раѓајќи синови и ќерки.

¹⁴Сала поживеа сто и триесет години и го роди Евер.

¹⁵А, откако го роди Евер, Сала поживеа триста и триесет години, раѓајќи синови и ќерки.

¹⁶Евер поживеа сто триесет и четири години, и го роди Фалек.

¹⁷По раѓањето на Фалек, Евер поживеа четиристотини и седумдесет години, раѓајќи синови и ќерки.

¹⁸А Фалек поживеа сто и триесет години и го роди Рагав.

¹⁹А, откако го роди Рагав, Фалек поживеа двесте и девет години, раѓајќи синови и ќерки.

²⁰Рагав поживеа сто триесет и две години и го роди Серух;

²¹а откако го роди Серух, Рагав поживеа двесте и седум години, раѓајќи синови и ќерки.

²²Серух поживеа сто и триесет години и го роди Нахор.

²³По раѓањето на Нахор, Серух поживеа двесте години, раѓајќи синови и ќерки.

²⁴Нахор, пак, поживеа седумдесет и девет години и го роди Тара;

²⁵по раѓањето на Тара, Нахор поживеа сто дваесет и девет години, раѓајќи синови и ќерки.

²⁶Тара поживеа седумдесет години и ги роди Аврам, Нахор и Аран.

²⁷А еве го родословието на Тара: Тара ги роди Аврам, Нахор и Аран; а Аран го роди Лот.

²⁸Аран умре кај таткото свој Тара во родната земја, во Ур Халдејски.

²⁹А Аврам и Нахор се оженија; името на жената Аврамова беше Сараја, а на жената Нахорова името ѝ беше Милка, ќерка на Аран, татко на Милка и Иска.

³⁰Сараја беше неплодна и немаше пород.

³¹И го зеде Тара синот свој, и внукот од синот свој, Лот, син Аранов, и Сараја, снаата своја, жената на неговиот син Аврам; па излегоа заедно од Ур Халдејски за да појдат во земјата хананска; и дојдоа до Харан, каде и се населија.

³²И поживеа Тара во харанската земја двесте и пет години; и умре Тара во Харан.