Read Свето Писмо: Стандардна Библија 2006 (со девтероканонски книги) Битие 25 Bible Online

Битие 25 - Свето Писмо: Стандардна Библија 2006 (со девтероканонски книги) bible

Битие 25

¹А Авраам зеде втора жена, по име Кетура.

²И таа му ги роди Зимран, Јокшан, Медан, Мидјан, Јишбак и Шуах.

³Јокшан ги роди Сева, (Теман) и Дедан. А Деданови синови беа (, Навдеел) Ашурим, Летушим и Леумим.

⁴А синови Мидјанови: Ефа, Ефер, Ханох, Авида и Елдаа. Сите тие беа потомци Кетурини.

⁵А Авраам сиот свој имот му го даде на (својот син) Исак.

⁶На синовите, пак, од своите наложници им даде Авраам подароци, и, уште додека беше жив, ги испрати на исток, во источната земја — далеку од синот негов Исак.

⁷А деновите на Авраамовиот живот, што го поживеа, беа сто седумдесет и пет години.

⁸И откако издивна, умре Авраам во среќна старост, престар и сит од животот, и се прибра кај народот свој.

⁹А го погребаа неговите синови, Исак и Исмаил, во пештерата Махпела, во нивата на Ефрон, синот на Хитиецот Цохар, што се наоѓаше спроти Мамре;

¹⁰на нивата (и во пештерата), што ја беше купил Авраам од синовите Хетеови, таму беше погребан Авраам со жена му Сара.

¹¹А по смртта Авраамова го благослови Бог Исак, синот негов. Исак живееше, пак, во Беер Лахај Рои.

¹²Еве го родословието на Исмаил, синот Авраамов, кого му го роди на Авраам Агара Египќанката, слугинката на Сара.

¹³Ова се имињата на синовите Исмаилови, како што ги именуваа во родовите нивни: првенецот Исмаилов е Навајот, па Кедар, Адбеел и Мивсам,

¹⁴потоа Мишма, Дума и Маса,

¹⁵Адад, Тема, Јетур, Нафиш и Кедма.

¹⁶Тоа се синовите Исмаилови, и тоа се имињата нивни според селата и градовите нивни. Тоа се племињата нивни.

¹⁷А деновите на животот Исмаилов се сто триесет и седум години. Потоа издивна и умре, и се прибра при својот род.

¹⁸Тие живееја од Хавила дури до Сур, што е пред Египет, на патот кон Асирија. Тие се населија спроти сите браќа свои.

¹⁹А ова е родословието на Исак, синот Авраамов: Авраам го роди Исак.

²⁰А Исак имаше четириесет години кога се ожени со Ревека, ќерката на Арамеецот Ветуил од Месопотамија, сестра на Арамеецот Лаван.

²¹И Исак Му се помоли на Господ за жената своја (Ревека), бидејќи таа беше неплодна; и Господ го чу, па Ревека, жената негова, зачна.

²²Но децата се удираа едно со друго во утробата нејзина, и таа рече: „Ако биде така, зошто ми е ова?“ И отиде да Го праша Господа.

²³А Господ ѝ рече: „Две племиња има во утробата твоја, и два народа ќе излезат од тебе; едниот народ ќе биде посилен од другиот и поголемиот ќе му служи на помалиот.“

²⁴И дојде времето да роди, а ете — близнаци во утробата нејзина.

²⁵Излезе синот првенец црвен, целиот рунтав како руно; и му дадоа име Исав.

²⁶А потоа излезе брат му, држејќи го Исав со рака за петата; нему му ставија име Јаков. А Исак имаше шеесет години, кога тие се родија.

²⁷И децата пораснаа: Исав стана вешт ловец и човек на полето, а Јаков човек кроток кој живееше во шатори.

²⁸Исак го сакаше Исав, зашто му се допаѓаше дивечот негов; а Ревека го сакаше Јаков.

²⁹Еднаш Јаков зготви јадење, и Исав дојде од полето уморен.

³⁰И му рече Исав на Јаков: „Дај ми да јадам од црвеното вариво, зашто сум уморен.“ Затоа му го дадоа прекарот Едом [5].

³¹Но Јаков му рече: „Продај ми го денес првородството твое!“

³²А Исав одговори: „Еве, јас умирам, па што ќе ми е тоа првородство?“

³³Но Јаков му рече: „Заколни ми се уште сега!“ И тој му се заколна. И му го продаде своето првородство на Јаков.

³⁴И Јаков му даде на Исав леб и варена леќа, и тој јадеше и пиеше, па стана и си отиде. Така Исав го презре првородството свое.