Read Свето Писмо: Стандардна Библија 2006 (со девтероканонски книги) Битие 5 Bible Online

Битие 5 - Свето Писмо: Стандардна Библија 2006 (со девтероканонски книги) bible

Битие 5

¹Ова е родослов на Адам: Кога Бог го создаде човекот, го создаде според образот Божји.

²Маж и жена ги создаде, и ги благослови, и ги нарече — човечки суштества — во денот кога беа создадени.

³Адам поживеа двеста и триесет години, кога му се роди (син) според подобието негово и според образот негов, и му даде име Сит.

⁴А откако го роди Сит, Адам поживеа уште седумстотини години, раѓајќи синови и ќерки.

⁵И сите денови, што ги поживеа Адам, изнесуваа деветстотини и триесет години; потоа тој умре.

⁶Сит, пак, поживеа двеста и пет години и му се роди Енох.

⁷По раѓањето на Енох, Сит живееше уште осумстотини и седум години, раѓајќи синови и ќерки;

⁸така поживеа Сит вкупно деветстотини и дванаесет години и потоа умре.

⁹Енох, пак, имаше сто и деведесет години, кога му се роди Каинан.

¹⁰А откако го роди Каинан, Енох живееше уште седумстотини и петнаесет години, раѓајќи синови и ќерки;

¹¹и така сите денови на Енох изнесуваа деветстотини и пет години; потоа тој умре.

¹²Каинан, пак, поживеа сто и седумдесет години и го роди Махалалеил;

¹³а по раѓањето на Махалалеил Каинан живееше уште седумстотини и четириесет години, раѓајќи синови и ќерки.

¹⁴И така Каинан поживеа вкупно деветстотини и десет години; и умре.

¹⁵А Махалалеил поживеа сто шеесет и пет години, и го роди Јаред.

¹⁶По Јаредовото раѓање Махалалеил живееше уште осумстотини и триесет години, раѓајќи синови и ќерки.

¹⁷А сите денови од животот на Махалалеил беа осумстотини деведесет и пет години; потоа тој умре.

¹⁸Јаред, пак, поживеа сто шеесет и две години и го роди Енох;

¹⁹а откако го роди Енох, Јаред живееше уште осумстотини години, раѓајќи синови и ќерки.

²⁰Сите денови, пак, од животот на Јаред изнесуваа деветстотини шеесет и две години; и умре.

²¹Енох, откако поживеа сто шеесет и пет години, го роди Метушелах;

²²а по раѓањето на Метушелах, Енох живееше според волјата Божја триста години, раѓајќи синови и ќерки.

²³А сите денови на Енох изнесуваа триста шеесет и пет години.

²⁴И Енох, живеејќи според волјата Божја, исчезна, бидејќи Бог го зеде.

²⁵Метушелах, пак, поживеа сто осумдесет и осум години, и го роди Ламех;

²⁶па, откако го роди Ламех, Метушелах живееше уште седумстотини осумдесет и две години, раѓајќи синови и ќерки;

²⁷а сите денови од животот на Метушелах беа деветстотини шеесет и девет години; потоа умре.

²⁸Ламех, пак, откако поживеа сто осумдесет и осум години, доби син.

²⁹И го нарече Ное, велејќи: „Овој ќе нѐ утеши во работите наши и во трудот на рацете наши на земјата, што Господ ја проколна.“

³⁰А откако се роди Ное, Ламех поживеа уште петстотини шеесет и пет години, раѓајќи синови и ќерки.

³¹Така поживеа Ламех вкупно седумстотини педесет и три години; и умре.

³²Ное имаше петстотини години, кога ги роди (трите сина): Сим, Хам и Јафет.