Read Свето Писмо: Стандардна Библија 2006 (со девтероканонски книги) 2 Царства 23 Bible Online

2 Царства 23 - Свето Писмо: Стандардна Библија 2006 (со девтероканонски книги) bible

2 Царства 23

¹Еве ги последните Давидови зборови: „Слово на Јесеевиот син Давид, беседа на мажот, кој е високо поставен, на помазаникот на Бога Јаковов и на слаткопевецот Израилев:

²‚Духот Господов говори преку мене, и словото Негово е на јазикот мој.

³Рече Бог Израилев, карпата Израилева ми говори: Оној што господари со луѓето, нека биде праведен, да господари со страхопочит кон Бога.

⁴И како што изутрина на разденување, при изгрејсонце на безоблачно небо, од греењето по дожд израснува од земјата трева,

⁵така е и со мојот дом во Бога. Зашто Тој направи со мене завет вечен, цврст и неизменлив. Така излегува од Него сето мое спасение и сета моја желба.

⁶А нечестивите ќе бидат како исфрлено трње, кое не се фаќа со рака;

⁷но кој сака да се допре до него, се вооружува со железо или со дрво од копје, и на местото во оган го изгорува.‘“

⁸Еве ги имињата на јунаците Давидови: Тахкемониецот Јошев-Башевет, главен меѓу тројцата: тој го крена копјето свое против осумстотини души и ги порази наеднаш.

⁹По него беше Елеазар, син од братот на татко му, еден од тројцата јунаци што беа со Давид и кои со префрлувања ги предизвикуваа Филистејците, кога тие се беа собрале да војуваат.

¹⁰Израилците излегоа против нив, и тој застана и ги поразуваше Филистејците дотаму, додека му се измори раката и се прилепи до мечот. И во тој ден Господ даде голема победа, и народот тргна по него, само за да ги собира убиените.

¹¹По него — Шама, син на Агеј од Харар. Кога Филистејците се собраа на едно место, каде што имаше нива засеана со леќа, народот избега од Филистејците,

¹²но тој застана среде нивата и ја заштити и ги порази Филистејците. И тогаш Господ даде голема победа.

¹³Тие тројца главни меѓу триесетте војводи тргнаа и на почетокот на жетвата влегоа кај Давид во Адуламската пештера, додека филистејските војници логоруваа во Рефаимската Долина.

¹⁴Тогаш Давид беше во укрепено место, а филистејската војска во Витлеем.

¹⁵Давид побара да пие и рече: „Кој ќе ми донесе да пијам вода од витлеемскиот кладенец што е покрај портите?“

¹⁶Тогаш тие тројцата јунаци се провреа низ филистејскиот логор, зафатија вода од витлеемскиот кладенец што е при портите, и зедоа, па му донесоа на Давид. Но тој не сакаше да ја пие, туку ја излеа во слава на Господ,

¹⁷и рече: „Да ме чува Господ да го направам тоа! Не е ли тоа крв на луѓето што одеа, со опасност по животот свој?“ И не сакаше да пие. Ете што извршија тие тројца јунаци!

¹⁸А Авеса, братот на Јоав, а син на Саруја беше началник меѓу тројцата; тој уби со копјето свое триста души и се прослави меѓу тие тројца.

¹⁹Меѓу тројцата тој беше многу истакнат и им стана началник, но на оние тројца не им беше рамен.

²⁰Ванеја, син на храбриот маж Јехојада, од Кавцеел, голем по делата, ги порази двајцата синови на Ариил моавски; тој истиот слезе во еден ров и уби лав по снежно време;

²¹тој уби и еден Египќанец, виден човек; Египќанецот имаше во раката копје, а тој излезе против него со стап и го грабна копјето од раката на Египќанецот и го уби со неговото копје,

²²ете, тоа го изврши Јехојадаевиот син Ванеја, и беше славен меѓу тројцата јунаци;

²³тој беше повиден од триесетте, но на оние тројца не им беше рамен. И Давид го постави за најблизок извршител на заповедите свои.

²⁴Еве ги имињата на јунаците при царот Давид: Асаил, братот на Јоав — во бројот на триесетте; Елханан, синот на Додо, од Витлеем,

²⁵Шама од Харод, Елика од Харод,

²⁶Хелец од Пелет, Ира, синот на Икеш од Текоа,

²⁷Авиезер од Анатот, Мевунај од Хуша,

²⁸Селмон од Ахох, Махарај од Нетофа,

²⁹Хелев, син на Баана, од Нетофа, Итај, син на Ривај од синовите Венијаминови во Гива,

³⁰Ванеја од Пиратон, Хидај од Нахале-Гааш.

³¹Ави-Алевон од Арава, Азмавет Бархумиецот,

³²Елијахба од Шаалевон; од синовите на Јашен — Јонатан,

³³Шама од Харар, Ахијам, син Шараров,

³⁴Елифелет, син Ахазбаев, син на еден човек од Маахат, Елијам, син на Ахитофела — Гилонецот.

³⁵Хецрај од Кармил, Паарај од Арав,

³⁶Јигал, Натанов син — од Цова, Ваниј од племето на Гад,

³⁷Целек Амонецот, Нахарај Бееротеецот, оруженосец на Јоав, Саруев син,

³⁸Ира Јитриецот, Гарев Јитриецот,

³⁹Урија Хитиецот. Сѐ — триесет и седум.