Read Свето Писмо: Стандардна Библија 2006 (со девтероканонски книги) 2 Царства 24 Bible Online

2 Царства 24 - Свето Писмо: Стандардна Библија 2006 (со девтероканонски книги) bible

2 Царства 24

¹Гневот Господов пак се разгори против Израилците и го поттикна меѓу нив Давид да рече: „Оди, преброј го Израил и Јуда.“

²И царот му кажа на војводата Јоав, кој беше при него: „Обиколи ги сите племиња Израилеви и Јудини од Дан до Вирсавија, и пребројте го народот за да знам, колку народ има.“

³Јоав му рече на царот: „Господ, Бог твој, да го умножи народот толку, колку што е, и уште стократно толку, и очите на господарот мој царот да го видат тоа; но зошто мојот цар — господар го бара тоа сега?“

⁴Но царскиот збор кон Јоав и воените началници надвладеа. И Јоав заедно со воените началници излезе од царот да го пребројува израилскиот народ.

⁵Тие го минаа Јордан и се здржаа во Ароер, десно од градот; потоа поминаа низ племето на Гад, кај Јазер,

⁶и дојдоа во Галаад и во земјата Тахтим — Ходши; и стигнаа во Дан-Јаан и околината, а потоа во Сидон;

⁷дојдоа во утврдениот град Тир и во сите хивијски и ханански градови, излегоа на југ од Јудеја, во Вирсавија,

⁸ја обиколија целата земја и стигнаа во Ерусалим по девет месеци и дваесет дена.

⁹Јоав му го предаде на царот списокот за народното пребројување; и излезе дека Израилци имаше осумстотини илјади мажи, силни, способни за војна, а Јудејци — петстотини илјади.

¹⁰И откако Давид го преброи народот, срцето му затрепка. И му рече Давид на Господ: „Тешко згрешив што постапив така; и сега Ти се молам, Господи, прости му го гревот на Твојот слуга, зашто јас постапив многу неразумно.“

¹¹Кога Давид стана на другиот ден изутрина, би слово Господово кон пророкот Гад, Давидов јасновидец:

¹²„Оди и кажи му на Давид: вака вели Господ: три казни ти предлагам; одбери си една од нив што ќе се исполни над тебе.“

¹³И дојде Гад при Давид, му соопшти и рече: „Одбери си, глад ли да биде во земјата твоја седум години, или три месеци да бегаш од непријателите свои, и тие да те гонат, или, пак, три дни да владее помор во твојата земја? Сега размисли и реши што да Му одговорам на Оној, Кој ме испрати.“

¹⁴Давид му одговори на Гад: „Многу ми е тешко; но нека паднам во рацете на Господ, зашто големо е Неговото милосрдие; само да не паднам во човечки раце.“ (И Давид избра помор во времето на пченичната жетва).

¹⁵И испрати Господ помор врз Израилците од утрината до определеното време. (И помор почна во народот) и умреа од народот, од Дан до Вирсавија, седумдесет илјади души.

¹⁶И ангел Божји ја испружи раката своја над Ерусалим, за да го опустоши; но Господ се покаја за злото и му кажа на ангелот, кој го поразуваше народот: „Доста, сега спушти ја раката своја.“ А Божјиот ангел тогаш беше при гумното на Јевусиецот Орна.

¹⁷Кога Давид го виде ангелот, кој го поразуваше народот, Му рече на Господ, велејќи: „Ете, јас згрешив, јас пастирот постапив беззаконо; но овие овци што направиле? Затоа Твојата рака нека се сврти против мене и против татковиот ми дом.“

¹⁸И во тој ден дојде Гад при Давид и рече: „Оди изгради му жртвеник на Господ врз гумното на Јевусиецот Орна.“

¹⁹Тогаш Давид отиде според зборот на пророкот Гад, како што беше заповедал Господ.

²⁰Орна погледна и виде дека царот и слугите негови доаѓаат при него; излезе Орна и му се поклони на царот ничкум до земја.

²¹Орна праша: „Зошто дошол мојот цар господар при својот слуга?“ Давид му одговори „Да го купам од тебе гумното за да изградам жртвеник на Господ, та да престане поморот во народот.“

²²Орна му рече на Давид: „Господарот мој, царот, нека земе и принесе жртва што му е по волја. Ете, воловите за сепаленица, а колата и опремата за впрегнување на воловите — за дрва.

²³Сето тоа, царе, Орна му го дава на царот.“ Орна му кажа уште на царот: „Господ, твојот Бог, нека биде милостив кон тебе!“

²⁴Но царот му рече на Орна: „Не, јас ќе ти платам, колку што чини, и нема да му принесам на Господ, мојот Бог, жртва, земена како дар.“ И Давид го купи гумното и воловите за педесет шекели сребро.

²⁵Давид изгради таму жртвеник на Господ и принесе сепаленици и жртви за мир. (Подоцна Соломон го прошири жртвеникот бидејќи беше мал). И Господ се смилостиви над земјата и поморот кај Израилците престана.