Read Свето Писмо: Стандардна Библија 2006 (со девтероканонски книги) 3 Царства 11 Bible Online

3 Царства 11 - Свето Писмо: Стандардна Библија 2006 (со девтероканонски книги) bible

3 Царства 11

¹Царот Соломон засака, освен фараоновата ќерка, и многу жени туѓинки — Моавки, Амонки, Едомки, Сидонки и Хитијки, —

²од оние народи, за кои Господ им беше рекол на Израилевите синови: не влегувајте кај нив, и тие да не влегуваат кај вас за да не го приклонат срцето ваше кон своите богови. Кон нив се прилепи Соломон со љубовта своја.

³Тој имаше седумстотини жени и триста наложници; и неговите жени го развратија срцето негово.

⁴Кога Соломон остаре, неговите жени го приклонија срцето негово кон други богови, и срцето негово не беше наполно предадено на неговиот Господ Бог, како срцето на татко му Давид.

⁵И Соломон почна да ѝ служи на Аштарта сидонската богинка, и на Милком, одвратен амонски бог.

⁶И Соломон го вршеше она што беше неугодно пред очите на Господ, и не го следеше наполно Господ како татко му Давид.

⁷Тогаш Соломон изгради многубожечко светилиште на Хамос, моавско паганско божество, на планината што е спроти Ерусалим, и на Молох, гнасен бог на Амониевите синови.

⁸Така направи тој за сите свои жени туѓинки, кои кадеа и принесуваа жртви на своите богови.

⁹И Господ се разгневи на Соломон поради тоа што го отстрани срцето свое од Господ, Бог Израилев, Кој на двапати му се беше јавувал

¹⁰и му беше заповедал да не оди по други богови; но тој не го исполни тоа што му го беше заповедал Господ Бог.

¹¹Тогаш Господ му рече на Соломон: „Затоа што тоа се врши кај тебе, и ти не го зачува Мојот завет и Моите наредби што ти ги бев заповедал, ќе го одземам царството од тебе и ќе го дадам на твојот слуга;

¹²но во твоите дни Јас нема да го направам ова поради татко ти Давид: од рацете на синот твој ќе го одземам;

¹³но нема целото царство да го одземам: едно племе ќе му дадам на синот твој заради Мојот слуга Давид и заради Ерусалим што сум го избрал.“

¹⁴И Господ му подигна на Соломон противник — Едомецот Адад, кој беше од едомски царски род.

¹⁵Кога Давид беше во Едом и војсководецот Јоав дојде да ги погребе убиените, откако беше испотепал сѐ што е машко во Едом, —

¹⁶бидејќи Јоав и сите Израилци престојуваа таму шест месеци, додека не истребија сѐ живо во Едом, —

¹⁷тогаш Адад избега во Египет и со него неколкумина Едомци што беа служеле кај татко му; Адад тогаш беше дете.

¹⁸Кога тргнаа од Мидјан, тие дојдоа во Фаран и зедоа со себе луѓе од Фаран и стигнаа во Египет кај фараонот — египетскиот цар; (Адад влезе кај фараонот), и тој му даде дом, му одреди плата и му даде земја.

¹⁹Адад се здоби со голема милост кај фараонот, така што го ожени со сестрата на жена си, сестра на царицата Тахпенеса.

²⁰Тахпенесината сестра му роди син Генуват. Тахпенеса го воспитуваше во фараоновиот дом; и Генуват живееше во фараоновиот дом заедно со фараоновите синови.

²¹Кога Адад слушна дека Давид починал кај татковците свои и дека војводата Јоав умрел, му рече на фараонот: „Пушти ме да појдам во земјата своја?“

²²Фараонот му рече: „Зар си незадоволен од мене, па сакаш да одиш во земјата своја.“ Тој одговори: „Не, но пушти ме.“ (И Адад се врати во својата земја).

²³Господ крена против Соломон и друг противник — Резон, Елијадовиот син, кој беше избегал од својот господар Адраазар, цовскиот цар,

²⁴и, откако собра околу себеси луѓе, стана старешина на чета, откако Давид го беше победил Хададезера; и тие отидоа во Дамаск, се настанија таму и господареа во Дамаск.

²⁵Тој беше противник на Израил во текот на сите дни на Соломон. Освен злото, извршено од Адад, тој секогаш му правеше пакост на Израил и стана арамејски цар.

²⁶Против Соломон крена рака и неговиот слуга Јеровоам, синот на Нават, Ефратец од Цереда, чија мајка беше вдовица и се викаше Саруа.

²⁷Еве по кој повод тој крена рака против царот: Соломон го градеше Мило, ги поправаше урнатините во градот на татко си Давид.

²⁸Јеровоам беше силен човек. Соломон, откако забележа дека тоа момче го бива за работа, го постави за надзорник над задолжените работници од Јосифовиот дом.

²⁹Во она време на Јеровоам му се случи да излезе од Ерусалим; по патот го сретна пророкот Ахија Силомец, облечен во нова облека. Тие беа само двајцата во полето.

³⁰И Ахија ја зеде новата облека што беше на него, ја раскина на дванаесет делови,

³¹и му рече на Јеровоам: „Земи си десет делови, зашто така вели Господ, Бог Израилев: ‚Ете го истргнувам царството од раката на Соломон и десет племиња ти давам тебе,

³²и едно племе ќе му остане нему заради Мојот слуга Давид и заради градот Ерусалим што го избраа од сите Израилеви племиња!

³³Ова е поради тоа што тие Ме оставија и почнаа да ѝ се поклонуваат на Аштарта, сидонската богинка, и на Хамос, моавскиот бог, и на Милком, амонскиот бог, и не одеа по Моите патишта за да го вршат она што е угодно пред Моите очи, и да ги пазат Моите наредби и Моите заповеди, како татко му Давид.

³⁴Јас не го одземам целото царство од раката негова, туку го оставам да владее до крајот на својот живот заради Мојот слуга Давид, кого го избрав и кој ги пазеше Моите заповеди и Моите наредби;

³⁵но ќе го одземам царството од раката на синот негов и десет племиња од него ќе ти ги дадам тебе;

³⁶а на синот негов ќе му дадам едно племе за да остане светилото на Мојот слуга Давид во сите дни пред лицето Мое во градот Ерусалим што го избрав за да остане засекогаш таму името Мое.

³⁷Тебе те избирам, и ти ќе владееш со сѐ што ќе посака душата твоја, и ти ќе бидеш цар над Израил;

³⁸и ако пазиш на сѐ што ќе ти заповедам, ако одиш по патиштата Мои и ако го вршиш она што е угодно пред очите Мои, пазејќи ги Моите наредби и Моите заповеди, како што правеше Мојот слуга Давид, Јас ќе бидам со тебе и ќе ти воздигнам крепок дом, како што му создадов на Давид, и ќе ти го дадам Израил;

³⁹ќе го понизам Давидовиот род за тоа, но не засекогаш.‘“

⁴⁰А Соломон сакаше да го убие Јеровоам, но Јеровоам стана, та избега во Египет кај Шишак, египетскиот цар, и живееше во Египет до смртта Соломонова.

⁴¹Другите дела на Соломон и сѐ што вршеше тој, и мудроста негова, се опишани во Книгата на делата Соломонови.

⁴²Времето, во кое Соломон царуваше во Ерусалим над целиот Израил, беше четириесет години.

⁴³И Соломон почина кај татковците свои и беше погребан во градот на татко си Давид; а место него се зацари синот негов Ровоам.