Read Свето Писмо: Стандардна Библија 2006 (со девтероканонски книги) 3 Царства 15 Bible Online

3 Царства 15 - Свето Писмо: Стандардна Библија 2006 (со девтероканонски книги) bible

3 Царства 15

¹На осумнаесеттата година од царувањето на Наватовиот син Јеровоам, над Јудејците стана цар Авијам.

²Тој царуваше во Ерусалим три години; името на мајка му беше Мааха, Авесаломова ќерка.

³Тој одеше во сите гревови на таткото свој што тој ги вршеше пред него, и срцето негово не беше предадено на неговиот Господ Бог, како срцето на неговиот прадедо Давид.

⁴Но заради Давид, неговиот Господ Бог му беше дал светило во Ерусалим, воздигнувајќи го по него синот негов и го закрепи Ерусалим,

⁵зашто Давид го правеше она што беше право пред очите на Господ, и во сите дни на животот свој во ништо не отстапуваше од она што Тој му беше заповедал, освен постапката со Хитиецот Урија.

⁶Меѓу Ровоам и Јеровоам имаше војна во сите дни на животот нивни.

⁷Другите дела на Авијам, и сѐ што вршел, е опишано во летописите на јудејските цареви. И имаше војна меѓу Авијам и Јеровоам.

⁸Авијам почина кај татковците свои и го погребаа во Давидовиот град. И наместо него стана цар синот негов Аса.

⁹Аса стана цар над Јудејците во дваесеттата година од царувањето на израилскиот цар Јеровоам,

¹⁰и царуваше во Ерусалим четириесет и една година; името на баба му беше Мааха, Авесаломова ќерка.

¹¹Аса го правеше она што беше угодно пред очите на Господ, како неговиот прадедо Давид.

¹²Тој ги изгони блудниците од земјата и ги отфрли сите идоли што ги беа направиле татковците негови,

¹³и дури и на баба си Мааха ѝ ја одзеде власта, поради тоа што беше направила идол на Ашера; и го скрши Аса и нејзиниот идол и го изгоре кај потокот Кедрон.

¹⁴Идолските светилишта, навистина, не беа урнати. Но срцето на Аса му беше предадено на Господ во сите негови денови.

¹⁵И тој ги внесе во домот на Господ предметите, посветени на неговиот татко, и предметите посветени од него: сребро, злато и садови.

¹⁶Меѓу Аса и израилскиот цар Баша имаше војна во текот на целиот нивен век.

¹⁷Израилскиот цар Баша излезе против Јудеја и почна да ја гради Рама, за да не може никој да излегува, ниту да оди кај јудејскиот цар Аса.

¹⁸Тогаш Аса го зеде сето сребро и злато што беше останало во ризницата на домот Господов и во ризницата на царскиот дом, и го даде во рацете на слугите свои; и царот Аса ги испрати кај Венадад, синот на Тавримон, син Хезионов, цар арамејски, кој живееше во Дамаск, велејќи:

¹⁹„Нека има сојуз меѓу мене и тебе, како што имаше меѓу мојот татко и твојот татко; ете, ти испраќам на дар сребро и злато; раскини го сојузот свој со израилскиот цар Баша, та да се оттргне од мене.“

²⁰И Венадад го послуша царот Аса, и ги испрати своите војсководци против израилските градови и ги порази Ијон, Дан, Авел-Бет-Мааха, областа околу Генисаретското Езеро и другиот дел од Нефталимовата земја.

²¹Кога го слушна тоа, Баша престана да ја гради Рама и се врати во Тирца.

²²А царот Аса ги собра сите Јудејци без исклучок, и тие ги изнесоа од Рама камењата и дрвјата, кои Баша ги употребуваше за градење. Со нив царот Аса ги изгради Гева Венијаминова и Мицпа.

²³Нели сите други дела на Аса сите негови подвизи и сѐ што изврши, и градовите што ги изгради, се опишани во летописите на јудејските цареви? Но во староста тој се разболе од болест на нозете.

²⁴Аса почина кај татковците свои и беше погребан кај нив во градот на својот предок Давид. А наместо него стана цар неговиот син Јосафат.

²⁵А Јеровоамовиот син Надав стана цар над Израил во втората година на јудејскиот цар Аса и царуваше над Израил две години.

²⁶Тој го вршеше она што беше неугодно пред очите на Господ, одеше по патот на татко си и во гревовите негови, со кои тој го наведе во грев Израил.

²⁷Против него се крена Баша, синот на Ахија, од Исахаровиот дом, и Баша го уби кај Гибетон филистејски, кога Надав и сите Израилци го опседнуваа Гибетон;

²⁸Баша го уби Надав во третата година од царувањето на јудејскиот цар Аса, и стана цар место него.

²⁹Кога стана цар, тој го порази целиот Јеровоамов дом и не остана ниедна душа кај Јеровоам, додека не го истреби, според словото на Господ што го беше изрекол преку својот слуга Ахија Силомецот,

³⁰поради гревовите на Јеровоам, што тој сам ги направи и со кои го наведе во грев Израил, поради гревовите со кои тој Го разгневи Господ, Бог Израилев.

³¹Другите дела на Надав, сѐ што тој извршил, се опишани во летописите на израилските цареви.

³²Меѓу Аса и израилскиот цар Баша имаше војна во текот на сите нивни денови.

³³Во третата година на јудејскиот цар Аса стана цар во Тирца над сите Израилци Ахиевиот син Баша и царуваше дваесет и четири години.

³⁴Тој го вршеше она што не беше угодно пред очите на Господ, и одеше по патот на Јеровоам и во гревовите негови, со кои тој го наведе во грев Израил.