Read Свето Писмо: Стандардна Библија 2006 (со девтероканонски книги) 3 Царства 16 Bible Online

3 Царства 16 - Свето Писмо: Стандардна Библија 2006 (со девтероканонски книги) bible

3 Царства 16

¹И дојде слово Господово кон Јуј, син на Ханани, за Баша во кое се вели:

²„Поради тоа што те издигнав од правот и те направив водач на мојот народ Израил, а ти тргна по патот на Јеровоам и го наведе на грев Мојот народ Израил за да Ме разгневува со гревовите свои, —

³ете, Јас ќе го отфрлам домот на Баша и домот на потомството негово и ќе направам со твојот дом така, како и со домот на Наватовиот син Јеровоам:

⁴кој од Башовиот дом ќе умре во град, него кучињата ќе го изедат, а кој ќе умре во полето, него птици небески ќе го исколваат.“

⁵Другите дела на Баша, и сѐ што извршил, и подвизите негови, опишани се во летописите на израилските цареви.

⁶Баша почина кај татковците свои и беше погребан во Тирца. А место него стана цар неговиот син Ила.

⁷Но преку Ананиевиот син Јуј беше веќе кажано словото Господово за Баша, за домот негов и за сето зло што го беше извршил пред очите на Господ, разгневувајќи Го со делата на рацете свои, постапувајќи како Јеровоамовиот дом, за што беше истребен.

⁸Башовиот син Ила стана цар над Израил во Тирца во дваесет и шестата година од царувањето на јудејскиот цар Аса и царуваше две години.

⁹Против него стана Замвриј, неговиот слуга и старешина на половината негови бојни коли, кога се беше напил во Тирца, во домот на Арца, надзорник на дворецот во овој град.

¹⁰Замвриј влезе, го удри и го уби Ила во дваесет и седмата година на јудејскиот цар Аса, и стана цар место него.

¹¹Кога стана цар и седна на престолот негов, тој го истреби целиот дом на Баша, не оставајќи му од семејството ниту едно машко, ни роднините негови, ни пријателите негови.

¹²Замвриј го истреби целиот Башов дом, според словото на Господ што го беше изрекол Тој за Баша преку пророкот Јуј,

¹³за сите гревови на Баша и за гревовите на неговиот син Ила што го вршеа тие самите и со кои го наведоа во грев Израил, дразнејќи Го Господ, Бог Израилев, со своите идоли.

¹⁴Другите дела на Ила, и сѐ што беше извршил, се опишани во летописите на израилските цареви.

¹⁵Замвриј стана цар во дваесет и седмата година на јудејскиот цар Аса и царуваше седум дена во Тирца, кога народот го опседнуваше Гибетон филистејски.

¹⁶Кога народот што го опседнуваше, дозна дека Замвриј направил заговор и го убил царот, истиот ден во логорот сите Израилци го поставија за цар над Израил воениот началник Амвријј.

¹⁷Амвриј и сите Изараилци со него отстапија од Гибетон и ја опседнаа Тирца.

¹⁸Кога Замвриј виде дека градот е преземен, влезе во царскиот дом, го потпали над себе царскиот дом и загина,

¹⁹поради своите гревови, со кои беше згрешил, вршејќи го она што беше лошо пред очите на Господ, одејќи по патот на Јеровоам и во гревовите негови што тој ги изврши за да го наведе во грев Израил.

²⁰Другите дела на Замвриј и заговорот негов што беше го направил, се опишани во летописите на израилските цареви.

²¹Тогаш израилскиот народ се раздели на два дела: едната половина од народот беше со Гинатовиот син Тивниј за да го направи цар него, а другата страна — со Амвриј.

²²Надвладеа народот што беше со Амвриј, над народот, кој беше со Гинатовиот син Тивниј; Тивниј загина, а цар стана Амвриј.

²³Амвриј стана цар над Израил во триесет и првата година од владеењето на јудејскиот цар Аса над Јудеја и царуваше дванаесет години. Тој царуваше во Тирца шест години.

²⁴Амвриј го купи од Шемер ридот Самарија, за два кикара сребро, изгради на ридот град и го нарече Самарија — според името на Шемер, сопственикот на тој рид.

²⁵И Амвриј правеше зло пред очите на Господ, и постапуваше полошо од сите свои претходници.

²⁶Тој во сѐ одеше по патот на Наватовиот син Јеровоам и во гревовите негови, со кои тој ги наведе на грев Израилците за да Го разгневат Господ, Бог Израилев, со своите идоли.

²⁷Другите дела на Амвриј што ги направил, и јунаштвото што го покажал, се опишани во летописите на израилските цареви.

²⁸Амвриј почина кај татковците свои и беше погребан во Самарија, а место него стана цар синот негов Ахав.

²⁹Амвриевиот син Ахав стана цар над Израил во триесет и осмата година од владеењето на царот Аса над Јудеја, и Амвриевиот син Ахав царуваше во Самарија над Израил дваесет и две години.

³⁰И Амвриевиот син Ахав правеше зло пред очите на Господ повеќе од сите свои претходници.

³¹Не беше доволно тоа што тој западна во гревовите на Наватовиот син Јеровоам, туку си ја зеде за жена Језавела, ќерката на сидонскиот цар Етбаал, и почна да му служи на Ваал и да му се поклонува;

³²и му подигна на Ваал жртвеник во Вааловото светилиште што го беше изградил во Самарија.

³³Ахав подигна и Ашера, а направи и други злодела, со кои Го разгневи Господ, Бог Израилев, повеќе од сите претходни израилски цареви.

³⁴Во негово време Хиел од Ветил го изгради Ерихон: врз првородениот син свој Авирон, тој ги стави основите негови и врз најмалиот син Сегув ги постави портите негови, според словото на Господ што Тој го беше изрекол преку Навиновиот син Исус.