Read Свето Писмо: Стандардна Библија 2006 (со девтероканонски книги) 3 Царства 21 Bible Online

3 Царства 21 - Свето Писмо: Стандардна Библија 2006 (со девтероканонски книги) bible

3 Царства 21

¹По тие настани еве што се случи: јизреелецот Навутеј имаше во Јизреел лозје до дворецот на самарјанскиот цар Ахав.

²Ахав му рече на Навутеј, велејќи: „Дај ми го лозјето свое; тоа ќе ми биде овоштарник, бидејќи е близу до мојот дом, а место него ќе ти дадам поубаво лозје од тоа, или, ако сакаш, ќе ти дадам сребро, колку што чини тоа.“

³Но Навутеј му одговори на Ахав: „Да не даде Господ да ти го дадам наследството од предците свои.“

⁴Ахав се врати во домот свој вознемирен и огорчен од зборовите што му ги беше кажал јизреелецот Навутеј, велејќи: „Нема да ти го дадам наследството од предците свои!“ Тој легна на својата постела, го покри лицето и не јадеше леб.

⁵Кај него влезе жена му Језавела и му рече: „Зошто си збркан со духот, па и леб не јадеш?“

⁶Тој ѝ одговори: „Кога му спомнав на јизреелецот Навутеј и му реков: ‚дај ми го лозјето за сребро, или, ако сакаш, да ти дадам друго лозје место него‘, — тој ми одговори — не ти го давам лозјето свое, наследство од предците мои.“

⁷Тогаш жена му Језавела му рече: „Нели ти си сега цар во Израил? Стани, јади леб и биди спокоен; јас ќе го земам лозјето од јизреелецот Навутеј.“

⁸И таа напиша писма од името на Ахав, ги запечати со неговиот печат и ги испрати до старешините и големците што живееја со Навутеј, во градот негов.

⁹Во писмата таа пишуваше вака: „Објавете пост и поставете го Навутеј пред народот;

¹⁰и спроти него ставете двајца лоши луѓе што ќе сведочат против него и да кажат: ‚Ти хулеше на Бога и на царот.‘ И потоа изведете го и убијте го со камења, та да умре.“

¹¹Тогаш мажите на неговиот град, старешините и големците што живееја во градот негов, направија како што им заповеда Језавела, така, како што беше напишано во писмата што го беше испратила до нив.

¹²Објавија пост и го поставија Навутеј пред народот;

¹³па излегоа двајца лоши луѓе, седнаа спроти него и сведочеа против него пред народот и велеа: „Навутеј хули на Бога и на царот.“ Па го изведоа надвор од градот, го убија со камења, и тој умре.

¹⁴Испратија да ѝ кажат на Језавела: „Навутеј е убиен со камења и умре.“

¹⁵Кога слушна дека Навутеј е убиен со камења и умрел, Језавела му рече на Ахав: „Стани и завладеј со лозјето на јизреелецот Навутеј, кој не сакаше да ти го даде за сребро, бидејќи Навутеј го нема меѓу живите, тој умрел.“

¹⁶Кога слушна дека јизреелецот Навутеј бил убиен, Ахав (ја раскина облеката своја, стави вреќиште врз себе, а потоа) стана и отиде во лозјето на јизреелецот Навутеј да го запоседне.

¹⁷Тогаш словото Господово беше упатено кон Илија тишбиецот:

¹⁸„Стани и пресретни го израилскиот цар Ахав, кој е во Самарија, — ете, сега е во лозјето на Навутеј, каде што дошол да го запоседне, —

¹⁹и кажи му: вака вели Господ: ‚ти си убил, и уште си грабнал наследство!‘ И кажи му: вака вели Господ: ‚на она место, каде што кучињата ја лижеа крвта на Навутеј, кучињата ќе ја лижат и твојата крв.‘“

²⁰Ахав му рече на Илија: „Ти ме најде, мој непријателе!“ Тој рече: „Те најдов, бидејќи ти се продаде за да правиш злодела пред очите на Господ и да Го гневиш.

²¹Вака вели Господ: ете, ќе ти испратам казна, ќе го уништам твоето потомство, истребувајќи откај Ахав сѐ што е машко — и оној што е роб, и оној што е слободен во Израил;

²²и ќе постапам со твојот дом така, како што постапив со домот на Наватовиот син Јеровоам и со домот на Ахиевиот син Баша, за наскрбувањето, со што ти ме раздразни и го наведе во грев Израил.“

²³И за Језавела Господ рече: „Кучињата ќе ја изедат Језавела зад јизреелските ѕидови;

²⁴и кој од Ахавовиот дом ќе умре во градот, него кучињата ќе го изедат, а кој ќе умре во полето, него птиците небески ќе го исколваат;

²⁵уште немало таков како Ахав, кој се продаде за да прави злодела пред очите на Господ, бидејќи така го наговараше жена му Језавела;

²⁶тој постапуваше многу гнасно, следејќи ги идолите, како што правеа Аморејците, кои Господ, ги изгони од пред лицето на Израилевите синови.“

²⁷Откако ги ислуша сите тие зборови, Ахав тажеше пред Господ, одеше плачејќи, ја раскина облеката своја, го покри телото свое со вреќиште, постеше и спиеше во вреќиште и одеше нажален.

²⁸И дојде слово Господово кон Илија од Тишбе. И Господ рече:

²⁹„Виде ли, се понижи Ахав пред Мене? Затоа што така се понижи пред Мене, Јас нема да му испратам зло во неговите дни, туку во дните на синот негов ќе пратам зло врз неговиот дом.“