Read Свето Писмо: Стандардна Библија 2006 (со девтероканонски книги) 2 Ездра 1 Bible Online

2 Ездра 1 - Свето Писмо: Стандардна Библија 2006 (со девтероканонски книги) bible

2 Ездра 1

¹Јошија му направи Пасха на својот Господ во Ерусалим, го закла пасхалното јагне во четиринаесеттиот ден на првиот месец

²и поставија во храмот Господов на смени свештеници во одежди.

³И им кажа на левитите, свештенослужители Израилеви: „Осветете се пред Господ, за да го поставите светиот Господов ковчег во храмот, што го изгради цар Соломон, синот на Давид. Нема зашто да го носите на раменици.

⁴Служете Му сега на Господ, вашиот Бог, и грижете се за народот Негов, Израил, подгответе се по вашите родови и племиња, според наредбата на Давид, царот Израилев, и според величественоста на синот негов Соломон;

⁵и откако ќе застанете во светилиштето, според родовите свои левитски, распоредете ги пред браќата свои, потомците на Израил,

⁶заколете го според уставот пасхалното јагне, пригответе жртви за браќата свои и направете Пасха според заповедта Господова, дадена на Мојсеј.“

⁷Јошија му подари на народот, што се најде таму, триесет илјади јагниња и козли и три илјади телци; тоа беше дадено од царските стада, како што тој му беше ветил на народот, свештениците и левитите.

⁸Хелкија, Захарија и Исиил, началници на храмот, им дадоа на свештениците за Пасха две илјади и шестотини овци и триста вола.

⁹А Јехонија, Шемаја, неговиот брат Натанаил, Хашавија, Охиил и Јорам, илјаданачалници, им дадоа на левитите за Пасха пет илјади овци и седумстотини вола.

¹⁰Еве како се одржуваше свеченоста: Свештениците и левитите стоеја благолепно, по поколенија и според предимството на родот,

¹¹држејќи бесквасници пред народот,

¹²за да Му принесуваат жртви на Господ, онака како што е заповедано во Мојсеевата книга. Тоа се одвиваше рано изутрина.

¹³Потоа го испекоа пасхалното јагне на оган, како што беше редот, а жртвите ги зготвија во бакарни садови и котли со пријатен мирис, и ги принесоа пред сиот народ.

¹⁴А потоа зготвија за себеси и за своите браќа свештеници, потомците Аронови. Зашто свештениците принесуваа лој до доцна, а левитите поради тоа готвеа за себеси и за своите браќа свештеници, потомците Аронови.

¹⁵А свештенопејачите, потомците на Асаф, беа на местата свои, според наредбите на Давид, и Асаф, и Захарија, и Единус, кои беа застапници на царот.

¹⁶И чуварите на портите не смееја да ја напуштат својата служба, па затоа готвеа за нив браќата нивни, левитите. И во тој ден се изврши сѐ, што се однесуваше до обредот на принесувањето жртви на Господ при одржувањето на Пасхата, принесени сепаленици врз Господовиот жртвеник, според заповедта на царот Јошија.

¹⁷И потомците Израилеви, што се наоѓаа во тоа време таму, ја славеа Пасхата и — празникот Бесквасници седум дена.

¹⁸Таква Пасха не беше празнувана во Израил од времето на пророкот Самоил.

¹⁹И ниеден од сите Израилски цареви не направил таква Пасха, каква што направи Јошија, заедно со свештениците, левитите, Јудејците и сите Израилци, што се наоѓаа тогаш во Ерусалим.

²⁰Таа Пасха беше празнувана во осумнаесеттата година од царувањето на Јошија.

²¹И делата Јошиеви беа управени кон вистински пат пред Господ, зашто неговото срце беше полно со благочестивост.

²²А она што беше станало во негово време, односно за оние, што грешеа и постапуваа нечестиво со Господ повеќе од секој народ и царство, и како тие свесно Го оскрбуваа, и како зборовите Господови се кренаа против Израил, — запишано е во поранешните летописи.

²³По сите овие дела на Јошија, се случи, фараонот, царот египетски, да отиде да војува во Харкамис кај Еуфрат, и Јошија му излезе во пресрет.

²⁴Египетскиот цар испрати да му кажат: „Што има меѓу мене и тебе, царе јудејски?

²⁵Не сум испратен против тебе од Господ Бог; мојата војна е на Еуфрат, и сега Господ е со мене и Господ ме поттикнува; отстапи и немој да Му се противставуваш на Господ.“

²⁶Но Јошија не се врати во колата своја, туку реши да војува со него, а да не ги послуша зборовите на пророкот Еремија од устата Господова.

²⁷И влезе против него во битка на полето Мегидо. И се собраа началниците кај царот Јошија.

²⁸Тогаш царот им рече на слугите свои: „Изведете ме од бојното поле, зашто сум изнемоштен.“ И слугите веднаш го изведоа од стројот.

²⁹Тој се качи на втората кола своја и, откако се врати во Ерусалим, умре, и го погребаа во гробницата на неговите предци.

³⁰И плачеа за Јошија по цела Јудеја, плачеше за Јошија и пророкот Еремија, и началниците со жените свои го оплакуваа и до денес. И тоа беше одредено секогаш да му се случува на целиот род Израилев.

³¹Тоа е запишано во летописите на јудејските цареви, како и она што го изврши Јошија, и славата негова, и како тој го разбираше законот Господов; а поранешните негови дела и оние, што се спомнуваат сега, се опишани во книгата на царевите израилски и јудејски.

³²И народот го зеде Јехонија, синот Јошиев, та го постави за цар наместо татко му Јошија, кога беше на дваесет и три години.

³³Тој царуваше во Јудеја и Ерусалим три месеци, и него го собори египетскиот цар, за да не царува во Ерусалим.

³⁴И му наложи на народот сто таланти сребро и еден талант злато.

³⁵Потоа го постави египетскиот цар братот негов Јоаким за цар на Јудеја и Ерусалим.

³⁶И ги врза големците, а братот негов Зариј го одведе во Египет.

³⁷А Јоаким беше на дваесет и пет години, кога стана цар над Јудеја и Ерусалим, и правеше зло пред Господ.

³⁸Против него излезе вавилонскиот цар, го окова во бакарни вериги и го одведе во Вавилон.

³⁹И откако зеде некои од свештените садови Господови, Навуходоносор ги пренесе и ги постави во своето светилиште во Вавилон.

⁴⁰Расказите за него и за неговата расипаност и нечесност се запишани во книгата на царските летописи.

⁴¹А место него стана цар синот негов Јоаким; тој беше на осумнаесет години кога го поставија за цар.

⁴²Тој царуваше во Ерусалим три месеци и десет дена и правеше зло пред Господ.

⁴³По една година Навуходоносор испрати по него, та го однесоа во Вавилон заедно со свештените садови Господови,

⁴⁴а за цар на Јудеја и Ерусалим го постави Седекија, кој беше на дваесет и една година. Тој царуваше единаесет години.

⁴⁵И тој правеше зло пред Господ, не слушајќи ги зборовите кажани преку пророкот Еремија од Господовата уста.

⁴⁶И бидејќи беше врзан од царот Навуходоносор со клетва во името Господово, тој ја наруши клетвата, се одметна, и стана упорен и жестокосрдечен, ги погази законите на Господ, Бог Израилев.

⁴⁷Исто така и старешините народни и свештениците постапија многу нечесно, надминувајќи ги со сите нечистотии сите незнабошци, и го осквернија осветениот храм Господов во Ерусалим.

⁴⁸А Бог на татковците нивни им испрати свој гласник, повикувајќи ги назад, зашто сакаше да ги поштеди и нив и своето живеалиште;

⁴⁹но тие им се смееја на неговите гласници, и секогаш кога Господ им говореше, тие им се подсмеваа на пророците Негови. И Тој се разгневи на народот Свој поради нечесноста, па им заповеда на халдејските цареви да се кренат против нив.

⁵⁰Тие ја сотреа со меч младината нивна околу нивниот свет храм, и не ги поштедија ни младичите, ни девиците, ни старо, ни младо, туку сите беа предадени во нивни раце.

⁵¹Ги зедоа сите свештени садови Господови, мали и големи, и садовите од Господовиот ковчег и царските ризници, и ги однесоа во Вавилон.

⁵²и го запалија Господовиот дом и ги разрушија ѕидовите ерусалимски, а кулите негови со оган ги изгореа;

⁵³и сета велелепност ја претворија во урнатини; а избеганите, пак, од меч, ги одведоа во Вавилон.

⁵⁴И тие му беа робови нему и на потомците негови сѐ до владеењето на Персијците. Така се исполни зборот Господов од устата на Еремија,

⁵⁵кој рече: „Додека земјата не ги отпразнува своите саботи, за сето време на запустувањето свое, во текот на седумдесет години, таа ќе саботничи.“