Read Свето Писмо: Стандардна Библија 2006 (со девтероканонски книги) 2 Ездра 2 Bible Online

2 Ездра 2 - Свето Писмо: Стандардна Библија 2006 (со девтероканонски книги) bible

2 Ездра 2

¹Во првата година од царувањето на Кир над Персија, за да се исполни зборот Господов од устата на Еремија,

²Господ го вдахнови персискиот цар Кир, и тој разгласи по целото царство свое усно и писмено: „Вака вели Кир, царот персиски: Господ Израилев, Господ на Височините ме постави за цар над светот и ми заповеда да Му изградам дом во Ерусалим, што е во Јудеја.

³Ако има некој меѓу вас, кој е од Неговиот народ, нека биде неговиот Господ со него, и нека оди во Ерусалим, што е во Јудеја, да Му гради дом на Господ Израилев, Тој е Господ, Кој живее во Ерусалим.

⁴И секому од вас, каде и да живее, нека му помогнат жителите од неговото родно место со злато и сребро, подарувајќи коњи и добиток и други ветени приноси за храмот Господов во Ерусалим.“

⁵Се кренаа старешините на родовите од Јудиното и Венијаминовото племе, и свештениците, и левитите, и сите, чиј дух го поттикнаа Господ, да одат и да го градат домот Господов во Ерусалим;

⁶а оние што живееја во соседството со нив, им помагаа во сѐ: со сребро и злато, со коњи и добиток и со многу заветни дарови принесени од оние, чиј дух беше поттикнат.

⁷И царот Кир ги изнесе свештените садови Господови, кои Навуходоносор ги беше пренел од Ерусалим и поставил во своето светилиште.

⁸А откако ги изнесе Кир, царот персиски, му ги предаде на Митридат, својот ризничар, па преку него му беа предадени на Сасавасар, кнез јудејски.

⁹Нивниот број беше: изливки златни — илјада, изливки сребрени — илјада, сребрени кадилници — дваесет и девет,

¹⁰златни чаши — триесет, сребрени — две илјади четиристотини и десет, и други садови — илјада.

¹¹Сите пренесени садови, сребрени и златни, беа пет илјади четиристотини шеесет и девет. Сасавасар сѐ донесе назад во Ерусалим заедно со луѓето што беа во заробеништво во Вавилон.

¹²А за време на владеењето на персискиот цар Артаксеркс, Бишлам и Митридат, Тавелиј и Раум, Веелтеем и писарот Шимшај и други, што се беа договориле со нив, а живееја во Самарија и на други места, му го напишаа следното писмо:

¹³„До царот-господар Артаксеркс, — твоите слуги Раум, летописец, и Шимшај, писар, и други од нивниот совет, и судиите, што се во Келе-Сирија и Феникија,

¹⁴нека му биде сега познато на царот-господар дека Јудејците кои тргнаа од кај вас за кај нас, дошле во Ерусалим, и го градат тој бунтовен и порочен град, му уредуваат плоштади, ги обновуваат ѕидиштата и полагаат темели на храмот.

¹⁵И така, ако тој град се изгради, и ако му ги довршат ѕидовите, тогаш не само што нема да се согласат да плаќаат данок, туку и ќе се кренат против царевите.

¹⁶И бидејќи веќе почна градењето на храмот, сметавме дека е добро да не го премолчиме тоа, туку да му јавиме на царот-господар, ако ти се чини дека е паметно да погледнеш во записите на твоите предци.

¹⁷Ќе најдеш што е запишано за тоа во летописните книги и ќе дознаеш дека овој град бил одметник и им создавал неволји на царевите и градовите, а Јудејците — одметници, вечно правеле заговори во него. Затоа и бил опустошен овој град.

¹⁸И така те известуваме сега царе-господаре дека, ако се изгради овој град и се обноват ѕидиштата негови, за тебе нема да има премин кон Келе-Сирија и Феникија.“

¹⁹Тогаш царот им испрати писмен одговор на летописецот Раум, на Веелтеем и на писарот Шимшај и на другите, што се беа договориле со нив и кои живееја во Самарија, Сирија и Феникија, со следнава содржина:

²⁰„Го прочитав писмото што ми го испративте,

²¹и заповедав да се прегледаат книгите; и се покажа дека овој град одамна се бори против царевите, и луѓето во него креваат востанија и водат војни,

²²дека имало во Ерусалим силни и моќни цареви, кои владееле и собирале данок од Келе-Сирија и Феникија.

²³Затоа им заповедав сега да им забранат на тие луѓе да го градат тој град,

²⁴и да се внимава, ништо повеќе да не се гради, така што делата на злонамерните нема да можат повеќе да ги обеспокојуваат царевите.“

²⁵Откако го прочитаа писмото од царот Артаксеркс, Раум и писарот Шимшај и договорените со нив брзо тргнаа за Ерусалим со коњица и со голем број вооружени од народот, и почнаа да ги спречуваат оние што градеа.

²⁶Така се запре градбата на ерусалимскиот храм до втората година од царувањето на Дариј, персискиот цар.