Read Свето Писмо: Стандардна Библија 2006 (со девтероканонски книги) 2 Ездра 7 Bible Online

2 Ездра 7 - Свето Писмо: Стандардна Библија 2006 (со девтероканонски книги) bible

2 Ездра 7

¹Тогаш Сисиниј војводата на Келе-Сирија и на Феникија, и Сатравузан и другарите нивни, следејќи го заповеданото од царот Дариј,

²го надгледуваа изведувањето на светото дело со голема внимателност, помагајќи им на старешините и на свештеноначалниците јудејски.

³И светото дело напредуваше успешно, додека пророкуваа пророците Агеј и Захарија.

⁴И завршија сѐ по заповедта на Господ, Бог Израилев, и по волјата на персиските цареви Кир, Дариј и Артаксеркс.

⁵Се заврши светиот дом на дваесет и третиот ден на месецот Адар, во шестата година на царот Дариј.

⁶И синовите Израилеви, свештениците, левитите, и другите, кои подоцна се вратија од пленство, и им се придружија, постапија според она што беше напишано во Мојсеевата книга.

⁷И принесоа жртва за осветување на храмот Господов сто вола, двесте овни, четиристотини јагниња,

⁸дванаесет козли за гревовите на сиот Израил, според бројот на дванаесетте племиња Израилеви.

⁹А свештениците и левитите стоеја облечени во одежди според родовите за службата на Господ, Бог Израилев, согласно со Мојсеевата книга, а чуварите на вратите на секоја врата.

¹⁰И потомците Израилеви кои се вратија од пленство направија Пасха, во четиринаесеттиот ден на првиот месец, откако се осветија заедно свештениците и левитите.

¹¹А и сите синови од пленството, бидејќи беа осветени: сите левити се очистија заедно.

¹²Па заклаа пасхални јагниња за сите синови од пленството, за браќата свои, свештеници, и за себеси.

¹³И јадеа синовите Израилеви, вратени од пленство, сите што се одделија од гнасотиите на народите од онаа земја и Го побараа Господа.

¹⁴И Го празнуваа празникот Бесквасници седум дена, радувајќи се пред Господ,

¹⁵затоа што Тој го сврте кон нив срцето на асирскиот цар, за да ги поткрепи рацете нивни за службите на Господ, Бог Израилев.