Read Свето Писмо: Стандардна Библија 2006 (со девтероканонски книги) Товит 10 Bible Online

Товит 10 - Свето Писмо: Стандардна Библија 2006 (со девтероканонски книги) bible

Товит 10

¹Товит, татко му на Товија, ги броеше деновите. Па, кога изминаа деновите предвидени за патувањето, а него уште го немаше,

²Товит рече: „Можеби ги задржале или можеби Гаваил умрел, па нема кој да им ги даде парите.“

³И многу се натажи.

⁴А жена му рече: „Синот наш загинал, затоа и го нема да се врати.“ (И почна да плаче по него и да говори:)

⁵„Тешко мене, чедо мое, што те пуштив, светлино на моите очи!“

⁶Товит почна тогаш да ја утешува, велејќи ѝ: „Молчи, не плачи, тој е жив и здрав.“

⁷Таа му рече: „Ти молчи и не мами ме; знам јас дека пострадал нашиот син.“ — Секој ден таа излегуваше надвор од градот на патот, по кој отпатува нивниот син; дење не јадеше ништо, а ноќе, непрестано плачеше по своето чедо Товија, сѐ додека не изминаа четиринаесет свадбени денови, за кои Рагуил го заколна да преседи таму. Тогаш Товија му рече на Рагуил: „Пушти ме да си одам, зашто татко ми и мајка ми веќе не се надеваат дека ќе ме видат.“

⁸Тестот негов му рече: „Остани кај мене, а јас ќе се погрижам да најдам некого што ќе го извести татко ти за тебе.“

⁹А Товија му одговори: „Не, пушти ме да се вратам кај татко ми.“

¹⁰Рагуил тогаш стана, му ја предаде Сара, неговата невеста, му го даде половината од својот имот, добиток и пари.

¹¹Откако ги благослови, се прости и се збогува со нив, велејќи: „Небесниот Бог да ве благослови пред да умрам.“

¹²А на својата ќерка ѝ рече: „Почитувај ги твоите свекор и свекрва; сега тие се твои родители; сакам да слушам само добри вести за тебе.“ И ја бакна. А Една му рече на Товија: „Брате мој сакан, Небесниот Господар нека те издигне и да ти подари да видиш деца од Сара, мојата ќерка, за да се нарадувам пред Господ. Еве, ти ја предавам мојата ќерка да се грижиш за неа и да не ја ожалостуваш.“

¹³Откако Му заблагодари на Бога што го благословил неговото патување, Товија им посака благослов на Рагуил и на неговата жена Една. Товија појде на пат. Патуваа и најпосле се приближија до Ниневија.