Read Свето Писмо: Стандардна Библија 2006 (со девтероканонски книги) Товит 11 Bible Online

Товит 11 - Свето Писмо: Стандардна Библија 2006 (со девтероканонски книги) bible

Товит 11

¹Тогаш Рафаил му рече на Товија: „Не знаеш ли, брате, во каква состојба го оставивме твојот татко?

²Ајде да побрзаме напред, пред твојата жена за да ја средиме куќата.

³Ти земи ја в рака жолчката од рибата.“ И така тргнаа, а и кучето потрча по нив.

⁴А тогаш и Ана седна покрај патот и чекаше да го здогледа своето чедо.

⁵И кога го препозна и виде дека се враќа, му рече на Товит: „Еве, се враќа синот твој и човекот што тргна со него.“

⁶Рафаил му рече на Товија: „Знај дека на татко ти ќе му се отворат очите;

⁷ти само намачкај му ги очите со жолчката, а тој, откако ќе почувствува јадеж, ќе почне да ги трла и така ќе паднат белите пердиња, и тој ќе прогледа.“

⁸Ана потрча, го гушна својот син и му рече: „Чедо мое, те видов; сега можам и да умрам.“ Тогаш обајцата се расплакаа.

⁹Товит излезе од вратата и се сопна, но син му притрча и го придржа татко си.

¹⁰Му намачка од жолчката преку очите и му рече: „Татко мој, биди силен!“

¹¹Тогаш почувствува лутина и јадеж во очите и почна да ги трла,

¹²па белите перденца паднаа од краиштата на неговите очи. Кога го виде својот син, го гушна,

¹³заплака и проговори: „Благословен си, Боже, и благословено е Твоето име во сите векови, благословени се сите Твои ангели!

¹⁴Зашто, Ти ме накажа, но пак се смилува на мене. Еве, го гледам мојот син Товија!“ А синот негов Товија со радост влезе во домот и му раскажа на својот татко за сите големи дела што му се случија во Мидија.

¹⁵Товит, преполн со радост и благословувајќи Го Бога, појде да ја пречека својата снаа кај портите на Ниневија. Оние што го видоа како оди, се чудеа дека прогледал.

¹⁶А Товит призна пред нив дека Бог го помилувал. Кога се доближи до својата снаа Сара, тој ја благослови и рече: „Добре дошла, ќерко моја! Нека е благословен Бог, Кој те доведе кај нас! Нека бидат благословени и татко ти и мајка ти!“ Се зарадуваа и сите негови браќа во Ниневија.

¹⁷И дојдоа Ахијахар и неговиот внук,

¹⁸па сите со веселба ја празнуваа свадбата на Товија седум дена.