Read Свето Писмо: Стандардна Библија 2006 (со девтероканонски книги) Товит 13 Bible Online

Товит 13 - Свето Писмо: Стандардна Библија 2006 (со девтероканонски книги) bible

Товит 13

¹Тогаш Товит, исполнет со радост, напиша молитва со овие зборови: „Благословен е Бог, Кој вечно живее и царството Негово е благословено!

²Зашто Тој казнува и се смилостивува, испраќа во ад и изведува оттаму; никој не може да избега од Неговата рака.

³Синови Израилеви, прославувајте Го пред незнабошците, зашто Тој нѐ распрсна меѓу нив.

⁴Таму објавувајте го величието Негово, издигнувајќи го над сѐ што живее, зашто Тој е нашиот Господ Бог, Тој е нашиот Татко низ вековите.

⁵Тој нѐ казнува за нашите лоши дела, но пак ќе се смилува и ќе нѐ собере од сите народи, меѓу кои сме расеани — каде и да сме.

⁶Ако се обраќате кон Него со сето срце свое и со сета душа своја, ако ја извршувате пред Него вистината, Тој ќе се сврти кон вас и нема да го скрие Своето лице од вас.

⁷Ќе видите што ќе направи со вас. Прославувајте Го со сите зборови на вашата уста, благословувајте Го Господа на правдата и вознесувајте Го Царот на вековите.

⁸Јас Го прославувам во земјата на моето прогонство и проповедам за Неговата сила и величина на народ од грешници. Обратете се, грешници, и извршувајте го она што е право пред Него. Кој знае, може ќе погледне и на вас и ќе се смилува на вас!

⁹Јас Го возвишувам мојот Бог — Небесниот Цар, и душата моја, се радува на Неговото величие.

¹⁰Сите нека говорат за Него и нека Го прославуваат во Ерусалим. Ерусалиме, граде свет, Тој ќе те казни за делата на твоите синови и пак ќе те помилува за твоите праведници.

¹¹Со усрдност прославувај Го Господа и благословувај Го Царот на вековите, та одново со радост да биде издигната Неговата скинија, за да се израдуваат незнабошците во тебе

¹²и прогонетите да најдат во тебе љубов од сите поколенија во сите векови.

¹³Многу народи ќе дојдат оддалеку кон името на Господ Бог, ќе носат дарови на своите раце, дарови за Небескиот Цар; многу поколенија ќе Те прославуваат со радосни воскликнувања.

¹⁴Проколнати да бидат сите што Те мразат, а засекогаш благословени, оние што Те сакаат!

¹⁵Радувај се и весели се за Твоите праведни синови, зашто ќе бидат собрани и ќе Го благословуваат Господа на праведниците. Блажени се оние што Те сакаат и што му се радуваат на Твојот мир!

¹⁶Блажени се оние што се натажени поради Твоите страдања, зашто ќе се зарадуваат кога ќе ја видат Твојата слава и вечно ќе се радуваат. Душата моја да Го благословува Бога — Великиот Цар!

¹⁷Зашто Ерусалим ќе биде изграден од сафир и смарагд и од скапоцени камења, а ѕидините, кулите и тврдините — од чисто злато. Плоштадите негови ќе бидат поплочени со берил, антракс и офирски скапоцени камења.

¹⁸По сите негови улици ќе се огласува песната ‚Алилуја‘ и ќе славословат, велејќи: ‚Благословен е Оној Кој го воздига Ерусалим за сите векови!‘“