Read Свето Писмо: Стандардна Библија 2006 (со девтероканонски книги) Товит 3 Bible Online

Товит 3 - Свето Писмо: Стандардна Библија 2006 (со девтероканонски книги) bible

Товит 3

¹Тогаш се натажив, се расплакав од жалост и почнав да се молам, со овие зборови:

²„Господи, Ти си праведен, и сите Твои дела и сите Твои патишта се — милост и вистина; Ти судиш со вистински и праведен суд со векови!

³Спомни си за мене и погледни ме милостиво: не казнувај ме за моите гревови, и за моите заблуди и за заблудите на моите предци што ги направиле тие пред Тебе.

⁴Бидејќи тие не ги послушале Твоите заповеди, и Ти ги предаде на грабеж, ропство и смрт и тие станаа пример за прекор пред сите народи меѓу кои сме расеани.

⁵Навистина, праведни се сите Твои судови — да постапуваш со мене според моите гревови и според гревовите на моите предци, затоа што не ги извршувале Твоите заповеди и не постапувале праведно пред Тебе.

⁶И затоа, постапувај со мене како што Ти е мило; заповедај да ми биде одземен мојот дух за да се ослободам и претворам во земја: зашто е подобро за мене да умрам, отколку да живеам, бидејќи слушам лажливи прекори и тагата моја е голема. Ослободи ме од таа тежина за да појдам во вечното живеалиште, и не свртувај го Твоето лице од мене.“

⁷Во истиот ден се случи и Сара, ќерката на Рагуил, во Екбатана Мидиска, да претрпи прекори од слугинките на својот татко,

⁸затоа што се беше мажела седумпати, но лошиот дух Асмодеј ги убивал пред да бидат со неа како со жена. Затоа тие ѝ велеле: „Зар не те гризе совеста што си ги задавувала своите мажи? Веќе седуммина си ги имала, а не се нарече со името на ниеден од нив.

⁹Зошто нас да нѐ биеш за нив? Тие умреа, оди и ти по нив за да не видиме твој син или твоја ќерка довека.“

¹⁰Кога го чула тоа, таа се натажила многу, така што решила да си го одземе животот, но си помислила: — мојот татко ме има само мене; ако го направам тоа, за него ќе биде голем срам и ќе го огорчам мојот стар татко и ќе го однесам во царството на мртвите.

¹¹Па почнала да се моли покрај прозорецот, велејќи: „Благословен си, Господи, Боже мој, и благословено е Твоето свето и славно име довека, нека Те благословуваат довека сите Твои дела!

¹²Сега ги свртувам очите мои и лицето мое кон Тебе, Господи;

¹³Ти се молам, земи ме од земјата и не дозволувај веќе да слушам прекори!

¹⁴Ти знаеш, Господи, дека сум чиста од секаков грев со маж,

¹⁵дека не сум го обесчестила своето име, ни името на мојот татко; јас сум единствено чедо, тој нема син, кој би можел да го наследи, ни близок брат, ни син од брат, за кого би можела да се омажам. Веќе загубив седум мажи. Па зошто уште да живеам. Ако, пак, не Ти е угодно да ме убиеш, тогаш сврти го погледот кон мене и смилостиви ми се за да не слушам веќе прекори.“

¹⁶Двете молитви, истовремено, беа слушнати од Самиот Господ Бог и Бог го испрати ангелот Божји Рафаил да ги излечи;

¹⁷да му ги отстрани белите петна од очите на Товит, а Сара, ќерката на Рагуил, да му ја даде за жена на Товија, синот на Товит, но претходно да го врзе лошиот дух Асмодеј, зашто било предназначено да ја наследи Товија. — Во едно и исто време Товит, откако се врати, влезе во својот дом, а Сара, Рагуиловата ќерка, слегна од горната соба.