Read Свето Писмо: Стандардна Библија 2006 (со девтероканонски книги) Товит 8 Bible Online

Товит 8 - Свето Писмо: Стандардна Библија 2006 (со девтероканонски книги) bible

Товит 8

¹Откако се навечераа, го воведоа и Товија кај Сара.

²А тој одејќи кон спалната соба, си ги спомна зборовите на Рафаил, па зеде кадилниче и ги стави внатре срцето и црниот дроб од рибата и покади.

³Демонот, штом ја почувствува таа миризба, избега во горните предели на Египет, и ангелот го врза.

⁴Кога се затворија во собата, Товија стана од постелата и ѝ рече на Сара: „Стани, сестро, да Му се помолиме на Господ, за да се смилува на нас.“

⁵Тогаш Товија почна да се моли: „Благословен си, Боже на нашите татковци, и благословено е Твоето свето и преславно име во сите векови! Да Те благословуваат небесата и сите твои созданија!

⁶Ти го создаде Адам и му ја даде за помошничка Ева, од нив произлезе човечкиот род. Ти си рекол: ‚Не е добро човек да биде сам; да му создадеме помошничка слична на него.‘

⁷И сега, Господи, јас ја земам оваа моја сестра не од телесна побуда, туку навистина како сопруга. Смилувај се на мене и направи да остареам со неа!“

⁸И тогаш заедно и двајцата рекоа: „Амин.“

⁹Потоа тие спиеја спокојно цела ноќ. Меѓутоа Рагуил стана и појде да ископа гроб,

¹⁰мислејќи дека е, можеби, и овој умрен;

¹¹па, кога се врати дома,

¹²ѝ рече на својата жена Една: „Испрати една од слугинките да види дали е жив; ако умрел, веднаш да го погребеме, та никој да не разбере.“

¹³Слугинката ја отвори вратата, и влезе во собата и виде дека спијат.

¹⁴Тогаш излезе надвор и јави дека е жив.

¹⁵Рагуил Му благодари на Бога, велејќи: „Боже, биди благословен со секој чист и свет благослов. Да Те благословуваат сите Твои светии, сите Твои созданија, сите Твои ангели и сите Твои избраници, — нека Те благословуваат во сите векови!

¹⁶Благословен си, зашто ме развесели; со мене не се случи онака како што мислев, туку ја покажа спрема нас Твојата голема милост.

¹⁷Благословен си затоа што се смилува спрема двајцата од ист род! Господи, излиј ја врз нив Твојата милосрдност, подари им да го завршат својот живот со здравје, веселба и милосрдие.“

¹⁸Тогаш им заповеда на своите слуги да го затрупаат гробот.

¹⁹Потоа приреди свадбена гозба, која продолжи четиринаесет дена.

²⁰Тогаш Рагуил го заколна, велејќи: „Не оди си дома додека не изминат деновите на свадбата, не оди си додека не изминат четиринаесетте свадбени денови,

²¹а тогаш прими ја половината од имотот и врати се жив и здрав кај твојот татко; остатокот од имотот ќе го добиеш откако умреме јас и мојата жена.“