Read Свето Писмо: Стандардна Библија 2006 (со девтероканонски книги) Јудита 11 Bible Online

Јудита 11 - Свето Писмо: Стандардна Библија 2006 (со девтероканонски книги) bible

Јудита 11

¹Олоферн ѝ рече на Јудита: „Жено, биди храбра, немај страв во твоето срце; јас не сум му направил лошо на никого, кој доброволно се решил да му служи на Навуходоносор, царот на целата земја.

²Па и сега, ако твојот народ, кој живее во планинските краишта, не беше ме презрел, јас немаше да го кренам моето копје против него, но тие самите се виновни за тоа.

³А сега кажи ми: зошто избега од нив и дојде кај мене? Овде ќе најдеш спас за себеси; не плаши се; животот ќе ти биде поштеден и сега и потоа.

⁴Никој нема да те навредува. Напротив, секој ќе ти прави добро; со тебе сите ќе се однесуваат како треба да се однесуваме со слугите на мојот господар — царот Навуходоносор.“

⁵Јудита му рече: „Послушај ги зборовите на твојата робинка. На робинката твоја нека ѝ биде дозволено да говори со тебе: ноќва нема да му говорам лага на својот господар.

⁶Ако ги послушаш зборовите на твојата робинка, Бог ќе ти помогне успешно да ја завршиш твојата работа, а господарот мој нема да се разочара во она што ќе го преземе.

⁷Да живее Навуходоносор, царот на целата земја! Да живее силата на оној што те испрати да управуваш со секое живо суштество, зашто преку тебе нему ќе му служат не само луѓето, туку и полските ѕверови и добитокот и птиците небески — преку твојата сила ќе живеат под власта на Навуходоносор и на целиот негов дом.

⁸Ние чувме за твојата мудрост и за бистрината на твојот ум, целата земја знае дека само ти си добар во целото царство, силен во знаење и опитен во воените работи и подвизи.

⁹А дознавме и за тоа што ти рекол Ахиор на твоето собрание. Бидејќи жителите на Ветилуја го оставија жив и тој им раскажа сѐ што ти говорел.

¹⁰А сега, моќен господаре, не оставај ги без внимание неговите зборови, туку нека останат во твоето срце, зашто тие се вистински: нашиот народ не може да биде казнет, а и мечот нема сила над него, освен кога грешат пред својот Бог.

¹¹Но мојот господар нека не биде одбиен и нека не остане без успех, а нив да ги стигне смртта, зашто ги надвладеа гревот, со кој Го разгневија својот Бог, затоа што го направија она што не е добро.

¹²И, ете, бидејќи нивната храна се сврши, а немаат веќе ни вода, решија да се нафрлат на добитокот и да го јадат она што им го забрани Бог со Својот закон.

¹³Дури решија да ги потрошат првините од житото и десетините од виното и од маслото што се веќе осветени и се чуваат за свештениците, кои стојат пред лицето на нашиот Бог во Ерусалим, а овие работи на никого од народот не му се позволени ни со рака да ги допре.

¹⁴Тие испратија гласници во Ерусалим, бидејќи и тамошните жители го правеле истото да им донесат дозвола за тоа од собранието на старешините.

¹⁵И штом им дојде тоа решение, тие ќе го направат тоа што наумиле, и истиот ден ќе ви бидат предадени да ги погубите.

¹⁶Ете зашто и јас, твојата робинка, откако разбрав за сите овие работи, избегав од нив; Бог ме прати да земам учество, заедно со тебе, во извршувањето на дела, од кои ќе се вџаши целата земја, кога ќе чуе за нив.

¹⁷Зашто твојата робинка е побожна и небесниот Бог Го почитува и дење и ноќе, па и сега, господаре мој, кога ќе останам со тебе, јас твојата робинка, ќе побарам од тебе да можам да излегувам ноќе во долината да Му се молам на Бога; Бог ќе ми каже кога тие ќе направат грев.

¹⁸Тогаш ќе се вратам и ќе ти кажам, а ти тогаш излези со целата твоја војска. Никој од нив не ќе ти се противстави.

¹⁹Тогаш јас ќе те водам низ Јудеја, сѐ до самиот Ерусалим. Среде него твојот престол ќе го поставам, а ти ќе ги подгониш како овци без пастир, така што и кучињата нема да залајат против тебе. Сето ова ми е кажано и објавено во откровение. Јас сум пратена сето ова да ти го објавам.“

²⁰Овие зборови му се допаднаа на Олоферн и на сите негови слуги. Сите се восхитија од нејзината мудрост, па извикаа:

²¹„Од едниот крај на земјата до другиот нема таква жена ни по убавина на лицето ни по мудроста на зборовите.“

²²Олоферн ѝ рече: „Добро направи Бог што те испрати пред твојот народ: нам ни припадна силата, а пропаста на оние што го презреа мојот господар.

²³Имаш прекрасно и благородно лице и твоите зборови се добри. Ако направиш сѐ како што рече, твојот Бог ќе биде и мој Бог; ќе живееш во домот на царот Навуходоносор и славна ќе бидеш по целата земја.“