Read Свето Писмо: Стандардна Библија 2006 (со девтероканонски книги) Јудита 12 Bible Online

Јудита 12 - Свето Писмо: Стандардна Библија 2006 (со девтероканонски книги) bible

Јудита 12

¹Заповеда да ја одведат таму, каде што се пазеле сребрените садови, нареди да ѝ даваат од неговата храна и од неговото вино.

²Но Јудита рече: „Нема да јадам од оваа храна за да не биде на соблазна; нека ми даваат она што сум го донела со себеси.“

³Олоферн ѝ рече: „А кога ќе заврши она што е со тебе, од каде ќе земаме да ти даваме исто? Зашто, меѓу нас нема ниеден од твојот род.“

⁴Јудита му одговори: „Да ти е жива душата, господаре мој, робинката твоја нема да го потроши ова што е со мене, пред Господ да го изврши преку мојата рака она што го определил.“

⁵Тогаш Олоферновите слуги ја одведоа во шаторот. Спиеше таа до полноќ. Се разбуди пред утринската стража,

⁶па прати да му кажат на Олоферн: „Господарот мој нека ѝ дозволи на својата робинка да излезе на молитва.“

⁷Олоферн им нареди на своите стражари да не ѝ пречат. Остана во логорот три дена, а ноќе излегуваше во Ветилујската рамнина и се измиваше на изворот покрај шаторот.

⁸Кога излегуваше, Јудита Му се молеше на својот Господ, Бог Израилев да го управи нејзиниот пат кон спасение на синовите на својот народ.

⁹Таа се враќаше чиста во шаторот, а приквечер ѝ донесуваа храна.

¹⁰Четвртиот ден Олоферн приреди гозба само за своите великодостојници; не повика никого од оние што му служеа.

¹¹Тој му рече на евнухот Вагој, кој раководеше со сето богатство: „Појди и наговори ја Еврејката што е кај тебе да дојде да јаде и да пие со нас;

¹²срамота е да имаме таква жена со нас, а да не поразговараме со неа; ако не ја поканиме ќе се подбива со нас.“

¹³Откако излезе откај Олоферн, Вагој отиде кај неа и ѝ рече: „Млада убавице, не колебај се да дојдеш кај мојот господар да ја имаш честа пред неговото лице, да пиеш вино заедно со нас во веселба, денес да бидеш како една од асирските ќерки, кои живеат во палатата на Навуходоносор.“

¹⁴Јудита му одговори: „Која сум јас да му се противам на мојот господар? Веднаш ќе направам сѐ што посакува мојот господар; тоа ќе ми биде и утеха и радост сѐ до мојата смрт.“

¹⁵Таа стана да се промени со сите женски накити. Слугинката нејзина отиде пред неа и ги посла ќилимите што ги беше добила од Вагој — пред Олоферн. Тие ѝ служеа за секојдневна употреба; да јаде потпрена на нив.

¹⁶Потоа дојде Јудита и седна на трпезата. Срцето на Олоферн по неа му се разбранува: силно посака да биде со неа; бараше случај и пригода да ја заведе.

¹⁷Олоферн ѝ рече на Јудита: „Пиј и весели се со нас!“

¹⁸А таа му одговори: „Ќе пијам, господаре, зашто животот мој денес се издигна повеќе отколку кога и да е од моето раѓање досега.“

¹⁹Па јадеше и пиеше пред него она што ѝ го беше приготвила нејзината слугинка.

²⁰А Олоферн ја гледаше со радост и пиеше извонредно многу, колку што не пиел никогаш во својот живот.